sare aalam se mere gham ka hai afsana juda

saare aalam se mire ġham kā hai afsāna judā

dil ke mātam ke liye chāhiye ġham-ḳhāna judā

garche vahshat kā nahīñ hai koī afsāna judā

par nazar aatā hai sab se tirā dīvāna judā

qurbat-e-husn ġhazab hai ki sar-e-mahfil-e-nāz

us ke lab se nahīñ hotā lab-e-paimāna judā

ai ḳhudā kashmakash-e-yās-o-tamannā kab talak

un ke rahne ke liye dil meñ ho har ḳhāna judā

aaj tañg aa ke ye nāseh ko diyā maiñ ne javāb

maz.hab-e-shaiḳh judā mashrab-e-rindāna judā

ḳhushk ho jaa.e jo baaqī hai rag-e-jāñ meñ lahū

dil se honā na abhī ai ġham-e-jānāna na judā

be-ḳhudī meñ bhī raqābat kā magar hai ehsās

ek sahrā meñ hai dīvāne se dīvāna judā

sabr kī mujh ko judā.ī meñ hai talqīn fuzūl

ye to jab ho ki rahe sham.a se parvāna judā

dasht jāgīr hai majnūñ kī to kyā fikr 'nazar'

khod kar ghar ko banā lījiye vīrāna judā

sare aalam se mere gham ka hai afsana juda

dil ke matam ke liye chahiye gham-KHana juda

garche wahshat ka nahin hai koi afsana juda

par nazar aata hai sab se tera diwana juda

qurbat-e-husn ghazab hai ki sar-e-mahfil-e-naz

us ke lab se nahin hota lab-e-paimana juda

ai KHuda kashmakash-e-yas-o-tamanna kab talak

un ke rahne ke liye dil mein ho har KHana juda

aaj tang aa ke ye naseh ko diya main ne jawab

mazhab-e-shaiKH juda mashrab-e-rindana juda

KHushk ho jae jo baqi hai rag-e-jaan mein lahu

dil se hona na abhi ai gham-e-jaanana na juda

be-KHudi mein bhi raqabat ka magar hai ehsas

ek sahra mein hai diwane se diwana juda

sabr ki mujh ko judai mein hai talqin fuzul

ye to jab ho ki rahe shama se parwana juda

dasht jagir hai majnun ki to kya fikr 'nazar'

khod kar ghar ko bana lijiye virana juda