sare hi zindagi ke fasane badal gae

saare hī zindagī ke fasāne badal ga.e

mausam kī tarah dost purāne badal ga.e

siskā hai ghar kī chhat pe parinda bhī raat bhar

khaa.e jahāñ nivāle gharāne badal ga.e

shānoñ pe jis pitā ne dikhāyā use jahāñ

biTiyā baḌī huī to Thikāne badal ga.e

paiñsaTh kī umr meñ bhī chaḌhī haiñ javāniyāñ

āb-o-havā ke saath siyāne badal ga.e

niklī hai qaid-e-ashk se muddat meñ ye 'kashish'

is marhale ke ba.ad zamāne badal ga.e

sare hi zindagi ke fasane badal gae

mausam ki tarah dost purane badal gae

siska hai ghar ki chhat pe parinda bhi raat bhar

khae jahan niwale gharane badal gae

shanon pe jis pita ne dikhaya use jahan

biTiya baDi hui to Thikane badal gae

painsaTh ki umr mein bhi chaDhi hain jawaniyan

aab-o-hawa ke sath siyane badal gae

nikli hai qaid-e-ashk se muddat mein ye 'kashish'

is marhale ke baad zamane badal gae