sare manzar ek jaise sari baaten ek si

saare manzar ek jaise saarī bāteñ ek sī

saare din haiñ ek se aur saarī rāteñ ek sī

be-natīja be-samar jañg-o-jadal suud o ziyāñ

saarī jīteñ ek jaisī saarī māteñ ek sī

sab mulāqātoñ kā maqsad kārobār-e-zar-garī

sab kī dahshat ek jaisī sab kī ghāteñ ek sī

ab kisī meñ agle vaqtoñ kī vafā baaqī nahīñ

sab qabīle ek haiñ ab saarī zāteñ ek sī

ek hī ruḳh kī asīrī ḳhvāb hai shahroñ kā ab

un ke mātam ek se un kī barāteñ ek sī

hoñ agar zer-e-zamīñ to fā.eda hone kā kyā

sañg o gauhar ek haiñ phir saarī dhāteñ ek sī

ai 'munīr' āzād ho is sehr-e-yak-rañgī se tū

ho ga.e sab zahr yaksāñ sab nabāteñ ek sī

sare manzar ek jaise sari baaten ek si

sare din hain ek se aur sari raaten ek si

be-natija be-samar jang-o-jadal sud o ziyan

sari jiten ek jaisi sari maten ek si

sab mulaqaton ka maqsad karobar-e-zar-gari

sab ki dahshat ek jaisi sab ki ghaten ek si

ab kisi mein agle waqton ki wafa baqi nahin

sab qabile ek hain ab sari zaten ek si

ek hi ruKH ki asiri KHwab hai shahron ka ab

un ke matam ek se un ki baraaten ek si

hon agar zer-e-zamin to faeda hone ka kya

sang o gauhar ek hain phir sari dhaten ek si

ai 'munir' aazad ho is sehr-e-yak-rangi se tu

ho gae sab zahr yaksan sab nabaaten ek si