sare ushshaq se hum achchhe hain

saare ushshāq se ham achchhe haiñ

haañ tire sar kī qasam achchhe haiñ

uljhā hī rahne do zulfoñ ko sanam

jo na khul jaa.eñ bharam achchhe haiñ

koī jañchtā nahīñ us but ke sivā

aur bhī yuuñ to sanam achchhe haiñ

hashr tak mujh ko jalā.e rakkhā

ye hasīnoñ ke bhī dam achchhe haiñ

bahs ho jaa.e to sab par khul jaa.e

haiñ bhale aap ki ham achchhe haiñ

ġhair kī kuchh nahīñ shirkat is meñ

ham ko ye tere sitam achchhe haiñ

jiite haiñ ārzū-e-qatl meñ ham

dam tire teġh-e-do-dam achchhe haiñ

na huā ka.abe kā dīdār nasīb

ham se āhū-e-haram achchhe haiñ

ḳhuub hai vaqt jo kaT jaatā hai

jo guzar jaate haiñ dam achchhe haiñ

pūchhte kyā haiñ mizāj-e-'kaifī'

aap kā lutf-o-karam achchhe haiñ

sare ushshaq se hum achchhe hain

han tere sar ki qasam achchhe hain

uljha hi rahne do zulfon ko sanam

jo na khul jaen bharam achchhe hain

koi janchta nahin us but ke siwa

aur bhi yun to sanam achchhe hain

hashr tak mujh ko jalae rakkha

ye hasinon ke bhi dam achchhe hain

bahs ho jae to sab par khul jae

hain bhale aap ki hum achchhe hain

ghair ki kuchh nahin shirkat is mein

hum ko ye tere sitam achchhe hain

jite hain aarzu-e-qatl mein hum

dam tere tegh-e-do-dam achchhe hain

na hua kabe ka didar nasib

hum se aahu-e-haram achchhe hain

KHub hai waqt jo kaT jata hai

jo guzar jate hain dam achchhe hain

puchhte kya hain mizaj-e-'kaifi'

aap ka lutf-o-karam achchhe hain