ساری بستی میں رفیق معتبر کوئی نہیں

ساری بستی میں رفیق معتبر کوئی نہیں

ایسی ویرانی کہ تا حد نظر کوئی نہیں

اس لیے محفل میں شاید جلوہ گر کوئی نہیں

سب تماشا گر ہیں لیکن دیدہ ور کوئی نہیں

بھیڑ تو ایسی ہے راہوں پر کہ چلنا ہے محال

میری تنہائی کہ میرا ہم سفر کوئی نہیں

ہم تو خوشبو ہیں بکھر جاتے ہیں گل سے چھوٹ کر

ہم یہاں بے گھر ہوئے پھر اپنا گھر کوئی نہیں

بند ہوتا ہے اگر اک در تو کھلتے ہیں ہزار

یہ نہ کہنا اب کہ تیرا داد گر کوئی نہیں

فرط غم میں ہم اسی منزل پہ جا پہونچے جہاں

ہم زباں کوئی نہیں ہے ہم سفر کوئی نہیں

آئنہ ٹوٹے تو مل جاتے ہیں صدہا شیشہ گر

دل اگر ٹوٹے تو اس کا چارہ گر کوئی نہیں

بے نیاز سنگ در جب تک تھا میں در تھے ہزار

اب جو سنگ در کی حسرت ہے تو در کوئی نہیں

اللہ اللہ فتنۂ ایام کی نیرنگیاں

ہر طرف شیشہ شکن ہیں شیشہ گر کوئی نہیں

ہم مصورؔ ان کو ڈھونڈھیں بھی تو اب ڈھونڈھیں کہاں

تھے جہاں رستے وہاں اب رہ گزر کوئی نہیں