sari hairat hai meri sari ada uski hai

saarī hairat hai mirī saarī adā us kī hai

be-gunāhī hai mirī aur sazā us kī hai

mere alfāz meñ jo rañg hai vo us kā hai

mere ehsās meñ jo hai vo fazā us kī hai

sher mere haiñ magar in meñ mohabbat us kī

phuul mere haiñ magar bād-e-sabā us kī hai

ik mohabbat kī ye tasvīr hai do rañgoñ meñ

shauq sab merā hai aur saarī hayā us kī hai

ham ne kyā us se mohabbat kī ijāzat lī thī

dil-shikan hī sahī par baat bajā us kī hai

ek mere hī sivā sab ko pukāre hai koī

maiñ ne pahle hī kahā thā ye sadā us kī hai

ḳhuun se sīñchī hai maiñ ne jo zamīñ mar mar ke

vo zamīñ ek sitam-gar ne kahā us kī hai

us ne hī is ko ujāḌā hai ise luuTā hai

ye zamīñ us kī agar hai bhī to kyā us kī hai

sari hairat hai meri sari ada us ki hai

be-gunahi hai meri aur saza us ki hai

mere alfaz mein jo rang hai wo us ka hai

mere ehsas mein jo hai wo faza us ki hai

sher mere hain magar in mein mohabbat us ki

phul mere hain magar baad-e-saba us ki hai

ek mohabbat ki ye taswir hai do rangon mein

shauq sab mera hai aur sari haya us ki hai

hum ne kya us se mohabbat ki ijazat li thi

dil-shikan hi sahi par baat baja us ki hai

ek mere hi siwa sab ko pukare hai koi

main ne pahle hi kaha tha ye sada us ki hai

KHun se sinchi hai main ne jo zamin mar mar ke

wo zamin ek sitam-gar ne kaha us ki hai

us ne hi is ko ujaDa hai ise luTa hai

ye zamin us ki agar hai bhi to kya us ki hai