sath le kar aae hain wo raushni aur chand phul

saath le kar aa.e haiñ vo raushnī aur chand phuul

munsalik bāham hue haiñ zindagī aur chand phuul

tazkira shāmil rahā un meñ tumhāre husn kā

raas ham ko aa ga.e haiñ shā.erī aur chand phuul

kitnā ma.anī-ḳhez hai ye ruup qabristān kā

qabr se lipTe hue haiñ ḳhāmushī aur chand phuul

ik musalsal rog hai ye muntazir āñkhoñ kā rog

yaad ke jangal meñ chamke phir hañsī aur chand phuul

merī āñkhoñ se Tapak kar ashk patthar ban ga.e

tere lahje kī khanak haiñ chāñdnī aur chand phuul

jī ye chāhe camere kī aañkh meñ mahfūz hoñ

khilkhilātī dhuup meñ ye janvarī aur chand phuul

koī batlā.egā 'āsif' is kī hai ta.abīr kyā

ḳhvāb meñ dekhe haiñ aksar ik parī aur chand phuul

sath le kar aae hain wo raushni aur chand phul

munsalik baham hue hain zindagi aur chand phul

tazkira shamil raha un mein tumhaare husn ka

ras hum ko aa gae hain shaeri aur chand phul

kitna mani-KHez hai ye rup qabristan ka

qabr se lipTe hue hain KHamushi aur chand phul

ek musalsal rog hai ye muntazir aankhon ka rog

yaad ke jangal mein chamke phir hansi aur chand phul

meri aankhon se Tapak kar ashk patthar ban gae

tere lahje ki khanak hain chandni aur chand phul

ji ye chahe camere ki aankh mein mahfuz hon

khilkhilati dhup mein ye janwari aur chand phul

koi batlaega 'asif' is ki hai tabir kya

KHwab mein dekhe hain aksar ek pari aur chand phul