saz-e-alam pe dil naghma-sara hota hai

sāz-e-ālām pe dil naġhma-sarā hotā hai

ai mohabbat ye tire daur meñ kyā hotā hai

phail jaatī hai fazāoñ meñ udāsī kī ghaTā

ishq jab husn se ro ro ke judā hotā hai

hausla diid kā hargiz na kareñ ahl-e-nazar

jalva-e-husn bahut hosh-rubā hotā hai

vo havas hai jo gila kartī hai ranj-o-ġham kā

ishq har haal meñ rāzī-ba-razā hotā hai

un ke mub.ham se ishāroñ kā ta.assur tauba

dil meñ kyā ma.arka-e-yās-o-rajā hotā hai

ham jo kahte haiñ use vaqt kā shahkār-e-jamīl

baat kuchh bhī nahīñ lekin vo ḳhafā hotā hai

ravish-e-ḳhās pe chaltā huuñ adab meñ 'parvez'

mere har sher kā andāz nayā hotā hai

saz-e-alam pe dil naghma-sara hota hai

ai mohabbat ye tere daur mein kya hota hai

phail jati hai fazaon mein udasi ki ghaTa

ishq jab husn se ro ro ke juda hota hai

hausla did ka hargiz na karen ahl-e-nazar

jalwa-e-husn bahut hosh-ruba hota hai

wo hawas hai jo gila karti hai ranj-o-gham ka

ishq har haal mein raazi-ba-raza hota hai

un ke mubham se ishaaron ka tassur tauba

dil mein kya marka-e-yas-o-raja hota hai

hum jo kahte hain use waqt ka shahkar-e-jamil

baat kuchh bhi nahin lekin wo KHafa hota hai

rawish-e-KHas pe chalta hun adab mein 'parwez'

mere har sher ka andaz naya hota hai