saz-e-hasti ka ajab josh nazar aata hai

sāz-e-hastī kā ajab josh nazar aatā hai

ik zamāna hama-tan-gosh nazar aatā hai

hasrat-e-jalva-e-dīdār ho puurī kyūñkar

vo tasavvur meñ bhī rū-posh nazar aatā hai

dekhte jaao zarā shahr-e-ḳhamoshāñ kā samāñ

ki zamāna yahāñ ḳhāmosh nazar aatā hai

aap ke nashtar-e-mizhgāñ ko chubho letā huuñ

ḳhūn-e-dil meñ jo kabhī josh nazar aatā hai

aap hī sirf jafā-kosh nazar aate haiñ

saarā aalam to vafā-kosh nazar aatā hai

mausam-e-gul na rahā dil na rahā jī na rahā

phir bhī vahshat kā vahī josh nazar aatā hai

shāna-e-yār pe bikhrī to nahīñ zulf-e-darāz

har koī ḳhānumāñ bar-dosh nazar aatā hai

jalva-e-qudrat-e-bārī kā muamma na khulā

rū-ba-rū rah ke bhī rū-posh nazar aatā hai

phir zarā ḳhanjar-e-qātil ko ḳhabar de koī

ḳhūn-e-'bismil' meñ vahī josh nazar aatā hai

saz-e-hasti ka ajab josh nazar aata hai

ek zamana hama-tan-gosh nazar aata hai

hasrat-e-jalwa-e-didar ho puri kyunkar

wo tasawwur mein bhi ru-posh nazar aata hai

dekhte jao zara shahr-e-KHamoshan ka saman

ki zamana yahan KHamosh nazar aata hai

aap ke nashtar-e-mizhgan ko chubho leta hun

KHun-e-dil mein jo kabhi josh nazar aata hai

aap hi sirf jafa-kosh nazar aate hain

sara aalam to wafa-kosh nazar aata hai

mausam-e-gul na raha dil na raha ji na raha

phir bhi wahshat ka wahi josh nazar aata hai

shana-e-yar pe bikhri to nahin zulf-e-daraaz

har koi KHanuman bar-dosh nazar aata hai

jalwa-e-qudrat-e-bari ka muamma na khula

ru-ba-ru rah ke bhi ru-posh nazar aata hai

phir zara KHanjar-e-qatil ko KHabar de koi

KHun-e-'bismil' mein wahi josh nazar aata hai