saz-e-hasti ki sada ghaur se sun

sāz-e-hastī kī sadā ġhaur se sun

kyuuñ hai ye shor bapā ġhaur se sun

din ke hañgāmoñ ko be-kār na jaan

shab ke pardoñ meñ hai kyā ġhaur se sun

chaḌhte sūraj kī adā ko pahchān

Dūbte din kī nidā ġhaur se sun

kyuuñ Thahar jaate haiñ dariyā sar-e-shām

ruuh ke taar hilā ġhaur se sun

yaas kī chhāñv meñ sone vaale

jaag aur shor zarā ġhaur se sun

har-nafas dām-e-giraftārī hai

nau-giraftār-e-balā ġhaur se sun

dil taḌap uThtā hai kyuuñ āḳhir-e-shab

do-ghaḌī kaan lagā ġhaur se sun

usī manzil meñ haiñ sab hijr-o-visāl

rah-rav-e-ābla-pā ġhaur se san

usī goshe meñ haiñ sab dair-o-haram

dil sanam hai ki ḳhudā ġhaur se sun

ka.aba sunsān hai kyuuñ ai vaa.iz

haath kānoñ se uThā ġhaur se sun

maut aur ziist ke asrār-e-rumūz

āmirī bazm meñ aa ġhaur se sun

kyā guzartī hai kisī ke dil par

tū bhī ai jān-e-vafā ġhaur se san

kabhī fursat ho to ai sub.h-e-jamāl

shab-gazīdoñ kī duā ġhaur se san

hai yahī sā.at-e-ījāb-o-qubūl

sub.h kī lau ko zarā ġhaur se sun

kuchh to kahtī haiñ chaTak kar kaliyāñ

kyā sunātī hai sabā ġhaur se sun

barg-e-āvāra bhī ik mutrib hai

tā.ir-e-naġhma-sarā ġhaur se sun

rañg minnat-kash-e-āvāz nahīñ

kal bhī hai ek navā ġhaur se sun

ḳhāmushī hāsil-e-mausīqī hai

naġhma hai naġhma-numā ġhaur se sun

aa.ina dekh ke hairān na ho

naġhma-e-āb-e-safā ġhaur se sun

ishq ko husn se ḳhālī na samajh

nāla-e-ahl-e-vafā ġhaur se sun

dil se har-vaqt koī kahtā hai

maiñ nahīñ tujh se judā ġhaur se sun

har-qadam rāh-e-talab meñ 'nāsir'

jaras-e-dil kī sadā ġhaur se sun

saz-e-hasti ki sada ghaur se sun

kyun hai ye shor bapa ghaur se sun

din ke hangamon ko be-kar na jaan

shab ke pardon mein hai kya ghaur se sun

chaDhte suraj ki ada ko pahchan

Dubte din ki nida ghaur se sun

kyun Thahar jate hain dariya sar-e-sham

ruh ke tar hila ghaur se sun

yas ki chhanw mein sone wale

jag aur shor zara ghaur se sun

har-nafas dam-e-giraftari hai

nau-giraftar-e-bala ghaur se sun

dil taDap uThta hai kyun aaKHir-e-shab

do-ghaDi kan laga ghaur se sun

usi manzil mein hain sab hijr-o-visal

rah-raw-e-abla-pa ghaur se san

usi goshe mein hain sab dair-o-haram

dil sanam hai ki KHuda ghaur se sun

kaba sunsan hai kyun ai waiz

hath kanon se uTha ghaur se sun

maut aur zist ke asrar-e-rumuz

aamiri bazm mein aa ghaur se sun

kya guzarti hai kisi ke dil par

tu bhi ai jaan-e-wafa ghaur se san

kabhi fursat ho to ai subh-e-jamal

shab-gazidon ki dua ghaur se san

hai yahi saat-e-ijab-o-qubul

subh ki lau ko zara ghaur se sun

kuchh to kahti hain chaTak kar kaliyan

kya sunati hai saba ghaur se sun

barg-e-awara bhi ek mutrib hai

tair-e-naghma-sara ghaur se sun

rang minnat-kash-e-awaz nahin

kal bhi hai ek nawa ghaur se sun

KHamushi hasil-e-mausiqi hai

naghma hai naghma-numa ghaur se sun

aaina dekh ke hairan na ho

naghma-e-ab-e-safa ghaur se sun

ishq ko husn se KHali na samajh

nala-e-ahl-e-wafa ghaur se sun

dil se har-waqt koi kahta hai

main nahin tujh se juda ghaur se sun

har-qadam rah-e-talab mein 'nasir'

jaras-e-dil ki sada ghaur se sun