sab baaten la-hasil Thahrin sare zikr fuzul gae

sab bāteñ lā-hāsil Thahrīñ saare zikr fuzūl ga.e

yaad rahā ik naam tumhārā baaqī sab kuchh bhuul ga.e

maiñ ne terā naam miTā kar terā chehra kyā bhūlā

biich samundar kashtī TuuTī hāthoñ se mastūl ga.e

tere saath tire raste meñ hañste-bolte sāthī the

mere saath mire raste meñ kāñTe aur babūl ga.e

shaam parinde lauT aa.e to ham tirī khoj meñ chal nikle

phir jañgal meñ raat huī aur ghar kā rasta bhuul ga.e

bahs-bharī mulāqāt ke ba.ad vo āḳhir bastī chhoḌ gayā

sab tāvīleñ ḳhaak huiiñ mire saare lafz fuzūl ga.e

havā ko kyā ma.alūm ho 'az.har' havā ke ek hī jhoñke se

kitnī shāḳheñ TuuT ga.iiñ aur kitne patte jhuul ga.e

sab baaten la-hasil Thahrin sare zikr fuzul gae

yaad raha ek nam tumhaara baqi sab kuchh bhul gae

main ne tera nam miTa kar tera chehra kya bhula

bich samundar kashti TuTi hathon se mastul gae

tere sath tere raste mein hanste-bolte sathi the

mere sath mere raste mein kanTe aur babul gae

sham parinde lauT aae to hum teri khoj mein chal nikle

phir jangal mein raat hui aur ghar ka rasta bhul gae

bahs-bhari mulaqat ke baad wo aaKHir basti chhoD gaya

sab tawilen KHak huin mere sare lafz fuzul gae

hawa ko kya malum ho 'azhar' hawa ke ek hi jhonke se

kitni shaKHen TuT gain aur kitne patte jhul gae