sab hai fani yahan sansar mein kis ka kya hai

sab hai faanī yahāñ sansār meñ kis kā kyā hai

fikr phir bhī hai tujhe apnā parāyā kyā hai

aap kā pahlā hī andāz batā detā hai

aap ko aap ke vālid ne sikhāyā kyā hai

zindagī ḳhud pe tū itnā bhī gumāñ mat karnā

chand sāñsoñ ke sivā terā asāsa kyā hai

phir se ik aur laḌā.ī ke bahāne ke sivā

tum batā do ki kisī jañg se miltā kyā hai

umr bhar kuchh na kiyā jis kī tamannā ke sivā

us ne pūchhā bhī nahīñ merī tamannā kyā hai

kuchh ġharīboñ kī galī meñ bhī diye jal jaa.eñ

is se behtar bhī divālī kā ujālā kyā hai

koī jazba koī ehsās na dhaḌkan hai koī

ye agar dil hai mire dost to sahrā kyā hai

daam man-māne use de ke ḳharīdā tū ne

dekh to le tujhe bāzār ne bechā kyā hai

vahī bhūke vahī aaheñ vahī aañsū haiñ 'sahāb'

shahr kā naam badal jaane se badlā kyā hai

sab hai fani yahan sansar mein kis ka kya hai

fikr phir bhi hai tujhe apna paraya kya hai

aap ka pahla hi andaz bata deta hai

aap ko aap ke walid ne sikhaya kya hai

zindagi KHud pe tu itna bhi guman mat karna

chand sanson ke siwa tera asasa kya hai

phir se ek aur laDai ke bahane ke siwa

tum bata do ki kisi jang se milta kya hai

umr bhar kuchh na kiya jis ki tamanna ke siwa

us ne puchha bhi nahin meri tamanna kya hai

kuchh gharibon ki gali mein bhi diye jal jaen

is se behtar bhi diwali ka ujala kya hai

koi jazba koi ehsas na dhaDkan hai koi

ye agar dil hai mere dost to sahra kya hai

dam man-mane use de ke KHarida tu ne

dekh to le tujhe bazar ne becha kya hai

wahi bhuke wahi aahen wahi aansu hain 'sahab'

shahr ka nam badal jaane se badla kya hai