sab jal gaya jalte hue KHwabon ke asar se

sab jal gayā jalte hue ḳhvāboñ ke asar se

uThtā hai dhuāñ dil se nigāhoñ se jigar se

aaj us ke janāze meñ hai ik shahr saf-ārā

kal mar gayā jo aadmī tanhā.ī ke Dar se

kab tak ga.e rishtoñ se nibhātā maiñ ta.alluq

is bojh ko ai dost utaar aayā huuñ sar se

jo ā.ina-ḳhāna mirī hairat kā sabab hai

mumkin hai mire ba.ad mirī diid ko tarse

is ahd-e-ḳhizāñ meñ kisī ummīd ke mānind

patthar se nikal aa.uuñ magar abr to barse

rūThe hue sūraj ko manāne kī lagan meñ

ham log sar-e-shām nikal paḌte haiñ ghar se

us shaḳhs kā ab phir se khaḌā honā hai mushkil

is baar girā hai vo zamāne kī nazar se

lagtā hai ki is dil meñ koī qaid hai 'ashfāq'

rone kī sadā aatī hai yādoñ ke khañDar se

sab jal gaya jalte hue KHwabon ke asar se

uThta hai dhuan dil se nigahon se jigar se

aaj us ke janaze mein hai ek shahr saf-ara

kal mar gaya jo aadmi tanhai ke Dar se

kab tak gae rishton se nibhata main talluq

is bojh ko ai dost utar aaya hun sar se

jo aaina-KHana meri hairat ka sabab hai

mumkin hai mere baad meri did ko tarse

is ahd-e-KHizan mein kisi ummid ke manind

patthar se nikal aaun magar abr to barse

ruThe hue suraj ko manane ki lagan mein

hum log sar-e-sham nikal paDte hain ghar se

us shaKHs ka ab phir se khaDa hona hai mushkil

is bar gira hai wo zamane ki nazar se

lagta hai ki is dil mein koi qaid hai 'ashfaq'

rone ki sada aati hai yaadon ke khanDar se