sab ke jalwe nazar se guzre hain

sab ke jalve nazar se guzre haiñ

vo na jaane kidhar se guzre haiñ

mauj-e-āvāz-e-pā-e-yār ke saath

naġhme dīvār-o-dar se guzre haiñ

aaj aayā hai apnā dhyān hameñ

aaj dil ke nagar se guzre haiñ

ghar ke goshe meñ the kahīñ pinhāñ

jitne sailāb ghar se guzre haiñ

zulf ke ḳham hoñ yā jahān ke ġham

mar miTe ham jidhar se guzre haiñ

sadaf-e-tah-nashīñ bhī kaañp gayā

kaise tūfān sar se guzre haiñ

baaġh shādāb mauj-e-gul hī nahīñ

sail-e-ḳhūñ bhī idhar se guzre haiñ

jab chaḌhī hai kamāñ kahīñ 'ābid'

tere mere jigar se guzre haiñ

sab ke jalwe nazar se guzre hain

wo na jaane kidhar se guzre hain

mauj-e-awaz-e-pa-e-yar ke sath

naghme diwar-o-dar se guzre hain

aaj aaya hai apna dhyan hamein

aaj dil ke nagar se guzre hain

ghar ke goshe mein the kahin pinhan

jitne sailab ghar se guzre hain

zulf ke KHam hon ya jahan ke gham

mar miTe hum jidhar se guzre hain

sadaf-e-tah-nashin bhi kanp gaya

kaise tufan sar se guzre hain

bagh shadab mauj-e-gul hi nahin

sail-e-KHun bhi idhar se guzre hain

jab chaDhi hai kaman kahin 'abid'

tere mere jigar se guzre hain