sab ke munh mein tale-wale ab bhi hain

sab ke muñh meñ tāle-vāle ab bhī haiñ

nafrat apne dil meñ paale ab bhī haiñ

ġham se hai mansūb mohabbat kā rishta

dard-o-ġham ke yaar havāle ab bhī haiñ

mere gaañv meñ log sadā sach hī kahte

yahāñ magar har dil meñ taale ab bhī haiñ

merī jhoñpḌī chhoTī sī hai lekin yaar

is meñ rahne vaale nirāle ab bhī haiñ

qaa.em haiñ gang-o-jamnī tahzībeñ bhī

gaañv meñ masjid aur shivāle ab bhī haiñ

juute chappal sab ko pahnā.e muflis

nange pairoñ meñ to chhāle ab bhī haiñ

jannat kī to chaah nahīñ rakhte 'āqib'

is duniyā meñ yaar ujāle ab bhī haiñ

sab ke munh mein tale-wale ab bhi hain

nafrat apne dil mein pale ab bhi hain

gham se hai mansub mohabbat ka rishta

dard-o-gham ke yar hawale ab bhi hain

mere ganw mein log sada sach hi kahte

yahan magar har dil mein tale ab bhi hain

meri jhonpDi chhoTi si hai lekin yar

is mein rahne wale nirale ab bhi hain

qaem hain gang-o-jamni tahziben bhi

ganw mein masjid aur shiwale ab bhi hain

jute chappal sab ko pahnae muflis

nange pairon mein to chhaale ab bhi hain

jannat ki to chah nahin rakhte 'aqib'

is duniya mein yar ujale ab bhi hain