sab ki maujudgi samajhta hai

sab kī maujūdgī samajhtā hai

dil kisī kī kamī samajhtā hai

ek hī shaḳhs se maiñ vāqif huuñ

jo mujhe ajnabī samajhtā hai

go mujhe jāntā nahīñ lekin

vo mirī shā.irī samajhtā hai

vasl ke ashk hijr ke aañsū

vo namī ko namī samajhtā hai

vahī merī zabāñ se hai vāqif

jo mirī ḳhāmushī samajhtā hai

aap ke sāmne maiñ ḳhush huuñ magar

mere dukh raam hī samajhtā hai

yahī urdu zabāñ kā hai jaadū

ab mujhe har koī samajhtā hai

maiñ use baat dil kī kahtā huuñ

vo use shā.irī samajhtā hai

itnā nādān bhī nahīñ hai vo

jo tumhārī hañsī samajhtā hai

kaun 'mahtāb' ab tumhārā hai

kaun dil kī lagī samajhtā hai

sab ki maujudgi samajhta hai

dil kisi ki kami samajhta hai

ek hi shaKHs se main waqif hun

jo mujhe ajnabi samajhta hai

go mujhe jaanta nahin lekin

wo meri shairi samajhta hai

wasl ke ashk hijr ke aansu

wo nami ko nami samajhta hai

wahi meri zaban se hai waqif

jo meri KHamushi samajhta hai

aap ke samne main KHush hun magar

mere dukh ram hi samajhta hai

yahi urdu zaban ka hai jadu

ab mujhe har koi samajhta hai

main use baat dil ki kahta hun

wo use shairi samajhta hai

itna nadan bhi nahin hai wo

jo tumhaari hansi samajhta hai

kaun 'mahtab' ab tumhaara hai

kaun dil ki lagi samajhta hai