sab ko ruswa bai bai kiya karo

sab ko rusvā baarī baarī kiyā karo

har mausam meñ fatve jaarī kiyā karo

rātoñ kā nīndoñ se rishta TuuT chukā

apne ghar kī pahre-dārī kiyā karo

qatra qatra shabnam gin kar kyā hogā

dariyāoñ kī da.ave-dārī kiyā karo

roz qasīde likkho gūñge bahroñ ke

fursat ho to ye begārī kiyā karo

shab bhar aane vaale din ke ḳhvāb buno

din bhar fikr-e-shab-bedārī kiyā karo

chāñd ziyāda raushan hai to rahne do

jugnū-bhayyā jī mat bhārī kiyā karo

jab jī chāhe maut bichhā do bastī meñ

lekin bāteñ pyārī pyārī kiyā karo

raat badan-dariyā meñ roz utartī hai

is kashtī meñ ḳhuub savārī kiyā karo

roz vahī ik koshish zinda rahne kī

marne kī bhī kuchh tayyārī kiyā karo

ḳhvāb lapeTe sote rahnā Thiik nahīñ

fursat ho to shab-bedārī kiyā karo

kāġhaz ko sab sauñp diyā ye Thiik nahīñ

sher kabhī ḳhud par bhī taarī kiyā karo

sab ko ruswa bari bari kiya karo

har mausam mein fatwe jari kiya karo

raaton ka nindon se rishta TuT chuka

apne ghar ki pahre-dari kiya karo

qatra qatra shabnam gin kar kya hoga

dariyaon ki dawe-dari kiya karo

roz qaside likkho gunge bahron ke

fursat ho to ye begari kiya karo

shab bhar aane wale din ke KHwab buno

din bhar fikr-e-shab-bedari kiya karo

chand ziyaada raushan hai to rahne do

jugnu-bhayya ji mat bhaari kiya karo

jab ji chahe maut bichha do basti mein

lekin baaten pyari pyari kiya karo

raat badan-dariya mein roz utarti hai

is kashti mein KHub sawari kiya karo

roz wahi ek koshish zinda rahne ki

marne ki bhi kuchh tayyari kiya karo

KHwab lapeTe sote rahna Thik nahin

fursat ho to shab-bedari kiya karo

kaghaz ko sab saunp diya ye Thik nahin

sher kabhi KHud par bhi tari kiya karo