sab kuchh to zindagi ki mata-e-safar mein hai

sab kuchh to zindagī kī matā-e-safar meñ hai

jab tum nazar meñ ho to zamāna nazar meñ hai

yuuñ bhī to soch nāz-kash-e-husn-e-dostāñ

terā bhī kuchh maqām kisī kī nazar meñ hai

paḌh lete haiñ vo sab kī nazar se diloñ kā haal

andar se kaun kyā hai sab un kī nazar meñ hai

kyuuñ ho rahā hai tajziya-e-jaur-e-nā-ravā

tasvīr kā ye ruḳh bhī kisī kī nazar meñ hai

yaaro shikār-e-vaqt huuñ yā āsmāñ-shikār

jo kuchh bhī huuñ sab ahl-e-nazar kī nazar meñ hai

ab kyā shikāyat-e-ravish-e-dostāñ karūñ

'ġhausī' mirī kamī bhī to merī nazar meñ hai

sab kuchh to zindagi ki mata-e-safar mein hai

jab tum nazar mein ho to zamana nazar mein hai

yun bhi to soch naz-kash-e-husn-e-dostan

tera bhi kuchh maqam kisi ki nazar mein hai

paDh lete hain wo sab ki nazar se dilon ka haal

andar se kaun kya hai sab un ki nazar mein hai

kyun ho raha hai tajziya-e-jaur-e-na-rawa

taswir ka ye ruKH bhi kisi ki nazar mein hai

yaro shikar-e-waqt hun ya aasman-shikar

jo kuchh bhi hun sab ahl-e-nazar ki nazar mein hai

ab kya shikayat-e-rawish-e-dostan karun

'ghausi' meri kami bhi to meri nazar mein hai