sab miT gae mange hai magar teri nazar aur

sab miT ga.e māñge hai magar terī nazar aur

ab laa.eñ kahāñ se batā dil aur jigar aur

kam ḳhaak ġharībān-e-mohabbat ko na jaano

uTTheñge isī ḳhaak se kal ḳhāk-ba-sar aur

har zarre meñ bas ek hī zarra nazar aa.e

gar chashm-e-tamāshā ko mile husn-e-nazar aur

kab baiTh sake manzil-e-hastī ko pahuñch kar

aage jo baḌā is se hai vo ek safar aur

duniyā meñ mohabbat kī kamī hai to balā se

ābād mohabbat kareñ aa shām-o-sahar aur

kyā tum ko takalluf hai mirī chāragarī meñ

ik tīr-e-nazar tīr-e-nazar tīr-e-nazar aur

ye kyā ki faqat ḳhaar hī qismat meñ likhe haiñ

ai ḳhāna-e-bar-andāz-e-chaman kuchh to idhar aur

'sarvar' kī kaTī kis tarah āḳhir shab-e-hijrāñ

kuchh tū hī batā qissa-e-ġham dīda-e-tar aur

sab miT gae mange hai magar teri nazar aur

ab laen kahan se bata dil aur jigar aur

kam KHak ghariban-e-mohabbat ko na jaano

uTThenge isi KHak se kal KHak-ba-sar aur

har zarre mein bas ek hi zarra nazar aae

gar chashm-e-tamasha ko mile husn-e-nazar aur

kab baiTh sake manzil-e-hasti ko pahunch kar

aage jo baDa is se hai wo ek safar aur

duniya mein mohabbat ki kami hai to bala se

aabaad mohabbat karen aa sham-o-sahar aur

kya tum ko takalluf hai meri chaaragari mein

ek tir-e-nazar tir-e-nazar tir-e-nazar aur

ye kya ki faqat KHar hi qismat mein likhe hain

ai KHana-e-bar-andaz-e-chaman kuchh to idhar aur

'sarwar' ki kaTi kis tarah aaKHir shab-e-hijran

kuchh tu hi bata qissa-e-gham dida-e-tar aur