sab neamaten hain shahr mein insan hi nahin

sab ne.amateñ haiñ shahr meñ insān hī nahīñ

kuchh yuuñ ki jaise ye koī nuqsān hī nahīñ

ik āyat-e-vajūd huuñ miTTī ke Dher meñ

mere nuzūl kī to koī shaan hī nahīñ

kābīna-e-vujūd kā maiñ bhī huuñ ik vazīr

aisā ki merā koī qalam-dān hī nahīñ

ye jang ab kahāñ ho badan meñ ki ruuh meñ

goyā ki ishq kā koī maidān hī nahīñ

dast-e-junūñ bhī tang huā dasht-e-ishq meñ

ab chaak kyā karūñ ki garebān hī nahīñ

hairāñ huuñ apne qatl kā ilzām kis ko duuñ

tauhīd meñ to shirk kā imkān hī nahīñ

'ehsās' ne butoñ meñ ḳhudā ko kiyā sharīk

is shirk ke baġhair to īmān hī nahīñ

sab neamaten hain shahr mein insan hi nahin

kuchh yun ki jaise ye koi nuqsan hi nahin

ek aayat-e-wajud hun miTTi ke Dher mein

mere nuzul ki to koi shan hi nahin

kabina-e-wujud ka main bhi hun ek wazir

aisa ki mera koi qalam-dan hi nahin

ye jang ab kahan ho badan mein ki ruh mein

goya ki ishq ka koi maidan hi nahin

dast-e-junun bhi tang hua dasht-e-ishq mein

ab chaak kya karun ki gareban hi nahin

hairan hun apne qatl ka ilzam kis ko dun

tauhid mein to shirk ka imkan hi nahin

'ehsas' ne buton mein KHuda ko kiya sharik

is shirk ke baghair to iman hi nahin