sabab-e-dard-e-jigar yaad aaya

sabab-e-dard-e-jigar yaad aayā

ya.anī vo tīr-e-nazar yaad aayā

jhilmilāne lage palkoñ pe nujūm

phir koī rashk-e-qamar yaad aayā

apnī manzil ke nishāñ paate hī

mujh ko āġhāz-e-safar yaad aayā

dekh kar aa.ina kis soch meñ ho

kyā koī ahl-e-nazar yaad aayā

bhūlne vaale taḌap uTThegā

maiñ kisī vaqt agar yaad aayā

un kī pāzeb udhar guuñj uThī

shor-e-zanjīr idhar yaad aayā

kyoñ ye bikhrā liye gesū tum ne

kyā koī ḳhāk-basar yaad aayā

ek hālat meñ basar ho na sakī

shaam ko vaqt-e-sahar yaad aayā

hil gayā qalb-e-do-ālam 'jarrār'

kaun kartā huā fariyād aayā

sabab-e-dard-e-jigar yaad aaya

yani wo tir-e-nazar yaad aaya

jhilmilane lage palkon pe nujum

phir koi rashk-e-qamar yaad aaya

apni manzil ke nishan pate hi

mujh ko aaghaz-e-safar yaad aaya

dekh kar aaina kis soch mein ho

kya koi ahl-e-nazar yaad aaya

bhulne wale taDap uTThega

main kisi waqt agar yaad aaya

un ki pazeb udhar gunj uThi

shor-e-zanjir idhar yaad aaya

kyon ye bikhra liye gesu tum ne

kya koi KHak-basar yaad aaya

ek haalat mein basar ho na saki

sham ko waqt-e-sahar yaad aaya

hil gaya qalb-e-do-alam 'jarrar'

kaun karta hua fariyaad aaya