sabhi andaz-e-husn pyare hain

sabhī andāz-e-husn pyāre haiñ

ham magar sādgī ke maare haiñ

us kī rātoñ kā intiqām na pūchh

jis ne hañs hañs ke din guzāre haiñ

ai sahāroñ kī zindagī vaalo

kitne insān be-sahāre haiñ

lāla-o-gul se tujh ko kyā nisbat

nā-mukammal se isti.āre haiñ

ham to ab Duub kar hī ubhreñge

vo raheñ shaad jo kināre haiñ

shab-e-furqat bhī jagmagā uTThī

ashk-e-ġham haiñ ki māh-pāre haiñ

ātish-e-ishq vo jahannam hai

jis meñ firdaus ke nazāre haiñ

vo hamīñ haiñ ki jin ke hāthoñ ne

gesū-e-zindagī sañvāre haiñ

husn kī be-niyāziyoñ pe na jā

be-ishāre bhī kuchh ishāre haiñ

sabhi andaz-e-husn pyare hain

hum magar sadgi ke mare hain

us ki raaton ka intiqam na puchh

jis ne hans hans ke din guzare hain

ai sahaaron ki zindagi walo

kitne insan be-sahaare hain

lala-o-gul se tujh ko kya nisbat

na-mukammal se istiare hain

hum to ab Dub kar hi ubhrenge

wo rahen shad jo kinare hain

shab-e-furqat bhi jagmaga uTThi

ashk-e-gham hain ki mah-pare hain

aatish-e-ishq wo jahannam hai

jis mein firdaus ke nazare hain

wo hamin hain ki jin ke hathon ne

gesu-e-zindagi sanware hain

husn ki be-niyaziyon pe na ja

be-ishaare bhi kuchh ishaare hain