sabhi gunah dhul gae saza hi aur ho gai

sabhī gunāh dhul ga.e sazā hī aur ho ga.ī

mire vajūd par tirī gavāhī aur ho ga.ī

rafū-garān-e-shahr bhī kamāl log the magar

sitāra-sāz haath meñ qabā hī aur ho ga.ī

bahut se log shaam tak kivāḌ khol kar rahe

faqīr-e-shahr kī magar sadā hī aur ho ga.ī

añdhere meñ the jab talak zamāna sāz-gār thā

charāġh kyā jalā diyā havā hī aur ho ga.ī

bahut sambhal ke chalne vaalī thī par ab ke baar to

vo gul khile ki shoḳhī-e-sabā hī aur ho ga.ī

na jaane dushmanoñ kī kaun baat yaad aa ga.ī

laboñ tak aate aate bad-duā hī aur ho ga.ī

ye mere haath kī lakīreñ khul rahī thiiñ yā ki ḳhud

shagun kī raat ḳhushbū-e-hinā hī aur ho ga.ī

zarā sī kargasoñ ko āb-o-dāna kī jo shah milī

uqaab se ḳhitāb kī adā hī aur ho ga.ī

sabhi gunah dhul gae saza hi aur ho gai

mere wajud par teri gawahi aur ho gai

rafu-garan-e-shahr bhi kamal log the magar

sitara-saz hath mein qaba hi aur ho gai

bahut se log sham tak kiwaD khol kar rahe

faqir-e-shahr ki magar sada hi aur ho gai

andhere mein the jab talak zamana saz-gar tha

charagh kya jala diya hawa hi aur ho gai

bahut sambhal ke chalne wali thi par ab ke bar to

wo gul khile ki shoKHi-e-saba hi aur ho gai

na jaane dushmanon ki kaun baat yaad aa gai

labon tak aate aate bad-dua hi aur ho gai

ye mere hath ki lakiren khul rahi thin ya ki KHud

shagun ki raat KHushbu-e-hina hi aur ho gai

zara si kargason ko aab-o-dana ki jo shah mili

uqab se KHitab ki ada hi aur ho gai