sabhi ko gham hai samundar ke KHushk hone ka

sabhī ko ġham hai samundar ke ḳhushk hone kā

ki khel ḳhatm huā kashtiyāñ Dubone kā

barahna-jism bagūloñ kā qatl hotā rahā

ḳhayāl bhī nahīñ aayā kisī ko rone kā

sila koī nahīñ parchhā.iyoñ kī puujā kā

ma.aal kuchh nahīñ ḳhvāboñ kī fasl bone kā

bichhaḌ ke tujh se mujhe ye gumān hotā hai

ki merī āñkheñ haiñ patthar kī jism sone kā

hujūm dekhtā huuñ jab to kaañp uThtā huuñ

agarche ḳhauf nahīñ ab kisī ke khone kā

ga.e the log to dīvār-e-qahqaha kī taraf

magar ye shor musalsal hai kaisā rone kā

mire vajūd pe nafrat kī gard jamtī rahī

milā na vaqt use āñsuoñ se dhone kā

sabhi ko gham hai samundar ke KHushk hone ka

ki khel KHatm hua kashtiyan Dubone ka

barahna-jism bagulon ka qatl hota raha

KHayal bhi nahin aaya kisi ko rone ka

sila koi nahin parchhaiyon ki puja ka

maal kuchh nahin KHwabon ki fasl bone ka

bichhaD ke tujh se mujhe ye guman hota hai

ki meri aankhen hain patthar ki jism sone ka

hujum dekhta hun jab to kanp uThta hun

agarche KHauf nahin ab kisi ke khone ka

gae the log to diwar-e-qahqaha ki taraf

magar ye shor musalsal hai kaisa rone ka

mere wajud pe nafrat ki gard jamti rahi

mila na waqt use aansuon se dhone ka