sabr wahshat-asar na ho jae

sabr vahshat-asar na ho jaa.e

kahīñ sahrā bhī ghar na ho jaa.e

rashk-e-paiġhām hai ināñ-kash-e-dil

nāma-bar rāhbar na ho jaa.e

dekho mat dekhiyo ki ā.īna

ġhash tumheñ dekh kar na ho jaa.e

hijr-e-parda-nashīñ meñ marte haiñ

zindagī parda-e-dar na ho jaa.e

kasrat-e-sajda se vo naqsh-e-qadam

kahīñ pāmāl-e-sar na ho jaa.e

mere taġh.īr-e-rañg ko mat dekh

tujh ko apnī nazar na ho jaa.e

mere aañsū na poñchhnā dekho

kahīñ dāmān tar na ho jaa.e

baat nāseh se karte Dartā huuñ

ki fuġhāñ be-asar na ho jaa.e

ai qayāmat na aa.iyo jab tak

vo mirī gor par na ho jaa.e

māna-e-zulm hai taġhāful-e-yār

baḳht-e-bad ko ḳhabar na ho jaa.e

ġhair se be-hijāb milte ho

shab-e-āshiq sahar na ho jaa.e

rashk-e-dushman kā fā.eda mālūm

muft jī kā zarar na ho jaa.e

ai dil āhista āh-e-tāb-shikan

dekh TukḌe jigar na ho jaa.e

'momin' īmāñ qubūl dil se mujhe

vo but āzurda gar na ho jaa.e

sabr wahshat-asar na ho jae

kahin sahra bhi ghar na ho jae

rashk-e-paigham hai inan-kash-e-dil

nama-bar rahbar na ho jae

dekho mat dekhiyo ki aaina

ghash tumhein dekh kar na ho jae

hijr-e-parda-nashin mein marte hain

zindagi parda-e-dar na ho jae

kasrat-e-sajda se wo naqsh-e-qadam

kahin pamal-e-sar na ho jae

mere taghir-e-rang ko mat dekh

tujh ko apni nazar na ho jae

mere aansu na ponchhna dekho

kahin daman tar na ho jae

baat naseh se karte Darta hun

ki fughan be-asar na ho jae

ai qayamat na aaiyo jab tak

wo meri gor par na ho jae

mana-e-zulm hai taghaful-e-yar

baKHt-e-bad ko KHabar na ho jae

ghair se be-hijab milte ho

shab-e-ashiq sahar na ho jae

rashk-e-dushman ka faeda malum

muft ji ka zarar na ho jae

ai dil aahista aah-e-tab-shikan

dekh TukDe jigar na ho jae

'momin' iman qubul dil se mujhe

wo but aazurda gar na ho jae