sabz-kheton se umaDti raushni taswir ki

sabz-khetoñ se umaDtī raushnī tasvīr kī

maiñ ne apnī aañkh se ik harf-gah tāmīr kī

sun qatār andar qatār ashjār kī sargoshiyāñ

aur kahānī paḌh ḳhizāñ ne raat jo tahrīr kī

kachchī qabroñ par sajī ḳhushbū kī bikhrī laash par

ḳhāmushī ne ik na.e andāz meñ taqrīr kī

bachpane kī dars-gāhoñ meñ purāne TaaT par

dil ne hairānī kī pahlī bārgah tasḳhīr kī

raushnī meñ raqs karte ḳhaak ke zarrāt ne

intihā-e-āb-o-gil kī avvalīñ tafsīr kī

kohsāroñ ke saroñ par bādaloñ kī pagḌiyāñ

ek tamsīl-e-numāyāñ āya-e-tat.hīr kī

dhund ke lashkar kā chāroñ or pahrā thā magar

ik diye ne raushnī kī raat bhar tash.hīr kī

aaj phir āb-e-muqaddas aañkh se hijrat kiyā

ghar pahuñchne meñ kisī ne aaj phir tāḳhīr kī

sabz-kheton se umaDti raushni taswir ki

main ne apni aankh se ek harf-gah tamir ki

sun qatar andar qatar ashjar ki sargoshiyan

aur kahani paDh KHizan ne raat jo tahrir ki

kachchi qabron par saji KHushbu ki bikhri lash par

KHamushi ne ek nae andaz mein taqrir ki

bachpane ki dars-gahon mein purane TaT par

dil ne hairani ki pahli bargah tasKHir ki

raushni mein raqs karte KHak ke zarraat ne

intiha-e-ab-o-gil ki awwalin tafsir ki

kohsaron ke saron par baadalon ki pagDiyan

ek tamsil-e-numayan aaya-e-tathir ki

dhund ke lashkar ka chaaron or pahra tha magar

ek diye ne raushni ki raat bhar tashhir ki

aaj phir aab-e-muqaddas aankh se hijrat kiya

ghar pahunchne mein kisi ne aaj phir taKHir ki