sabz mausam ki KHabar le ke hawa aai ho

sabz mausam kī ḳhabar le ke havā aa.ī ho

kaam patjhaḌ ke asīroñ kī du'ā aa.ī ho

lauT aa.ī ho vo shab jis ke guzar jaane par

ghaaT se pāyaleñ bajne kī sadā aa.ī ho

isī ummīd meñ har mauj-e-havā ko chūmā

chhū ke shāyad mire pyāroñ kī qabā aa.ī ho

giit jitne likhe un ke liye ai mauj-e-sabā

dil yahī chāhā ki to un ko sunā aa.ī ho

āhaTeñ sirf havāoñ kī hī dastak na baneñ

ab to darvāzoñ pe mānūs sadā aa.ī ho

yuuñ sar-e-'ām khule sar maiñ kahāñ tak baiThūñ

kisī jānib se to ab merī ridā aa.ī ho

jab bhī barsāt ke din aa.e yahī jī chāhā

dhuup ke shahr meñ bhī ghir ke ghaTā aa.ī ho

tere tohfe to sab achchhe haiñ magar mauj-e-bahār

ab ke mere liye ḳhushbū-e-hinā aa.ī ho

sabz mausam ki KHabar le ke hawa aai ho

kaam patjhaD ke asiron ki du'a aai ho

lauT aai ho wo shab jis ke guzar jaane par

ghaT se payalen bajne ki sada aai ho

isi ummid mein har mauj-e-hawa ko chuma

chhu ke shayad mere pyaron ki qaba aai ho

git jitne likhe un ke liye ai mauj-e-saba

dil yahi chaha ki to un ko suna aai ho

aahaTen sirf hawaon ki hi dastak na banen

ab to darwazon pe manus sada aai ho

yun sar-e-'am khule sar main kahan tak baiThun

kisi jaanib se to ab meri rida aai ho

jab bhi barsat ke din aae yahi ji chaha

dhup ke shahr mein bhi ghir ke ghaTa aai ho

tere tohfe to sab achchhe hain magar mauj-e-bahaar

ab ke mere liye KHushbu-e-hina aai ho