sabza baala-e-zaqan dushman hai KHalqullah ka

sabza bālā-e-zaqan dushman hai ḳhalqullāh kā

rah-ravoñ kī maut hai ḳhas-posh honā chaah kā

mil biThānā hai falak manzūr kis dil-ḳhvāh kā

burj-e-mīzāñ meñ nahīñ be-vaj.h aanā maah kā

bas ki phirtā hai ḳhayāl āñkhoñ meñ us dil-ḳhvāh kā

rañg-rū ke uḌne meñ aalam hai gard-e-rāh kā

safha-e-dil se uThā.ūñ kis tarah naqsh-e-sanam

mulk meñ hotā kisī ke ghar nahīñ allāh kā

kam-bizā.at se ḳhayāl-e-ḳhām hai kasrat ko faiz

iktifā kartā nahīñ lashkar ko paanī chaah kā

rāh-e-hastī meñ hai ruḳhsār-e-sanam se zindagī

tāza-dam kartā musāfir ko hai takiya raah kā

laash bhī galiyoñ meñ khiñchvā kar kiyā hai qatl-e-yār

tuul hī denā mazā hai qissa-e-kotāh kā

past fitrat se sivā.e rañj kuchh hāsil nahīñ

pā-ba-gil kashtī ko kar detā hai paanī thaah kā

chhoḌ kar ishq-e-sanam zāhid na ho maftūn-e-hūr

kab yaqīñ laatā hai daanā duur kī afvāh kā

dil ko abrū-e-sanam kā shefta kartī hai aañkh

dars detā hai moallim pahle bismillāh kā

ai sanam banda-navāzī hai sifat allāh kī

haif hai ḳhālī phire saa.il tirī dargāh kā

mā.il-e-māshūqa-e-ḳhusrav na ho ai kohkan

sher ke jhūTe ko khānā kaam hai rubāh kā

josh ashk-e-ātishīñ kā baa.is āh-e-sard hai

garm kartī hai havā jaaḌe kī paanī chaah kā

naza.a meñ aayā na bālīñ par mire yaar is liye

āḳhir-e-har-māh hai ma.amūl chhupnā maah kā

huuñ vo abtar tifl jis ko jaan khonā khel hai

kunj-e-marqad hai gharauñdā merī bāzī-gāh kā

āsmāñ rū-e-zamīñ hai yaar māh-e-chār-dah

halqa-e-ahbāb gird us ke hai haala maah kā

vo dahan hai chashma-e-shīrīñ tabassum mauj hai

vo zaqan hai chaah ḳhaal us meñ tavā hai chaah kā

nā-tavāñ merī tarah se hai jo ishq-e-husn se

koh se bhārī tarāzū meñ ho palla kaah kā

sher kahtā huuñ maiñ ai 'ātish' ḳhudā kī hamd meñ

merī har ik bait par aalam hai baitullāh kā

sabza baala-e-zaqan dushman hai KHalqullah ka

rah-rawon ki maut hai KHas-posh hona chah ka

mil biThana hai falak manzur kis dil-KHwah ka

burj-e-mizan mein nahin be-wajh aana mah ka

bas ki phirta hai KHayal aankhon mein us dil-KHwah ka

rang-ru ke uDne mein aalam hai gard-e-rah ka

safha-e-dil se uThaun kis tarah naqsh-e-sanam

mulk mein hota kisi ke ghar nahin allah ka

kam-bizaat se KHayal-e-KHam hai kasrat ko faiz

iktifa karta nahin lashkar ko pani chah ka

rah-e-hasti mein hai ruKHsar-e-sanam se zindagi

taza-dam karta musafir ko hai takiya rah ka

lash bhi galiyon mein khinchwa kar kiya hai qatl-e-yar

tul hi dena maza hai qissa-e-kotah ka

past fitrat se siwae ranj kuchh hasil nahin

pa-ba-gil kashti ko kar deta hai pani thah ka

chhoD kar ishq-e-sanam zahid na ho maftun-e-hur

kab yaqin lata hai dana dur ki afwah ka

dil ko abru-e-sanam ka shefta karti hai aankh

dars deta hai moallim pahle bismillah ka

ai sanam banda-nawazi hai sifat allah ki

haif hai KHali phire sail teri dargah ka

mail-e-mashuqa-e-KHusraw na ho ai kohkan

sher ke jhuTe ko khana kaam hai rubah ka

josh ashk-e-atishin ka bais aah-e-sard hai

garm karti hai hawa jaDe ki pani chah ka

naza mein aaya na baalin par mere yar is liye

aaKHir-e-har-mah hai mamul chhupna mah ka

hun wo abtar tifl jis ko jaan khona khel hai

kunj-e-marqad hai gharaunda meri bazi-gah ka

aasman ru-e-zamin hai yar mah-e-chaar-dah

halqa-e-ahbab gird us ke hai haala mah ka

wo dahan hai chashma-e-shirin tabassum mauj hai

wo zaqan hai chah KHal us mein tawa hai chah ka

na-tawan meri tarah se hai jo ishq-e-husn se

koh se bhaari taraazu mein ho palla kah ka

sher kahta hun main ai 'atish' KHuda ki hamd mein

meri har ek bait par aalam hai baitullah ka