sabza tumhaare ruKH ke liye tang ho gaya

sabza tumhāre ruḳh ke liye tañg ho gayā

tuutī kā aks aa.ine meñ zañg ho gayā

past-o-buland dahr meñ khātā huuñ Thokareñ

aisā samand-e-umr-e-ravāñ lañg ho gayā

bismil ko bhī taḌapne kī miltī nahīñ jagah

kyā arsa-e-hayāt-e-jahāñ tañg ho gayā

ham-zād se bhī ye tan-e-lāġhar huā subuk

tolā to apne saaye kā pāsañg ho gayā

josh-e-junūñ ne jism ke purze uḌā diye

raḳht-e-barahnagī bhī mujhe tañg ho gayā

us but se jism-e-zār jo lipTā shab-e-visāl

aalam ko ehtimāl-e-rag-e-sañg ho gayā

mazmūn-e-āh-e-garm ne jalva dikhā diyā

uḌ kar havā meñ naama mirā chañg ho gayā

naale kiye tasavvur-e-gesū meñ raat bhar

dil ham-safīr-e-murġh-e-shab-āhañg ho gayā

sar kaT ke gir paḌā usī qātil ke paañv par

jallād se milāp dam-e-jañg ho gayā

uḌ uḌ ke mere chehre par ai shoḳh rah gayā

murġh-e-shikasta-bāl mirā rañg ho gayā

kartā rahā luġhāt kī tahqīq umr bhar

a.amāl-nāma nusḳha-e-farhañg ho gayā

muñh tak bhī zo.af se nahīñ aa saktī dil kī baat

darvāza ghar se saikḌoñ farsañg ho gayā

mahrūm huuñ maiñ ḳhidmat-e-ustād se 'munīr'

kalkatta mujh ko gor se bhī tañg ho gayā

sabza tumhaare ruKH ke liye tang ho gaya

tuti ka aks aaine mein zang ho gaya

past-o-buland dahr mein khata hun Thokaren

aisa samand-e-umr-e-rawan lang ho gaya

bismil ko bhi taDapne ki milti nahin jagah

kya arsa-e-hayat-e-jahan tang ho gaya

ham-zad se bhi ye tan-e-laghar hua subuk

tola to apne saye ka pasang ho gaya

josh-e-junun ne jism ke purze uDa diye

raKHt-e-barahnagi bhi mujhe tang ho gaya

us but se jism-e-zar jo lipTa shab-e-visal

aalam ko ehtimal-e-rag-e-sang ho gaya

mazmun-e-ah-e-garm ne jalwa dikha diya

uD kar hawa mein nama mera chang ho gaya

nale kiye tasawwur-e-gesu mein raat bhar

dil ham-safir-e-murgh-e-shab-ahang ho gaya

sar kaT ke gir paDa usi qatil ke panw par

jallad se milap dam-e-jang ho gaya

uD uD ke mere chehre par ai shoKH rah gaya

murgh-e-shikasta-baal mera rang ho gaya

karta raha lughat ki tahqiq umr bhar

aamal-nama nusKHa-e-farhang ho gaya

munh tak bhi zoaf se nahin aa sakti dil ki baat

darwaza ghar se saikDon farsang ho gaya

mahrum hun main KHidmat-e-ustad se 'munir'

kalkatta mujh ko gor se bhi tang ho gaya