sach agar puchho to na-paida hai yak-ru aashna

sach agar pūchho to nā-paidā hai yak-rū āshnā

saare aalam meñ jo hoñ shāyad to yak do āshnā

hāzir o ġhā.eb ho yaksāñ zāhir o bātin ho saaf

is tarah kā kam nazar aayā hai yaksū āshnā

ham vo muḳhlis haiñ ki āñkheñ dekhte guzrī hai umr

jī nikal jaave jo ho ham se kaj-abrū āshnā

saare aalam se karūñ maiñ tark rasm-e-dostī

mujh se hove ai mire dushman agar tū āshnā

kis ke kūche meñ tū ho niklī thī haañ sach kah nasīm

tujh meñ jo bū hai so hai muddat se ye bū āshnā

jāñ-ba-lab huuñ maiñ to in yāroñ kī ḳhush-ḳhalqī ko dekh

hai ma.āz-allāh jo ho sohbat meñ bad-ḳhū āshnā

ek bhī ham ne na dekhā dost 'hātim' ba.ad-e-marg

hai takalluf-bar-taraf kū yaar aur kū āshnā

sach agar puchho to na-paida hai yak-ru aashna

sare aalam mein jo hon shayad to yak do aashna

hazir o ghaeb ho yaksan zahir o baatin ho saf

is tarah ka kam nazar aaya hai yaksu aashna

hum wo muKHlis hain ki aankhen dekhte guzri hai umr

ji nikal jawe jo ho hum se kaj-abru aashna

sare aalam se karun main tark rasm-e-dosti

mujh se howe ai mere dushman agar tu aashna

kis ke kuche mein tu ho nikli thi han sach kah nasim

tujh mein jo bu hai so hai muddat se ye bu aashna

jaan-ba-lab hun main to in yaron ki KHush-KHalqi ko dekh

hai maaz-allah jo ho sohbat mein bad-KHu aashna

ek bhi hum ne na dekha dost 'hatim' baad-e-marg

hai takalluf-bar-taraf ku yar aur ku aashna