sach ka lamha jab bhi nazil hota hai

sach kā lamha jab bhī nāzil hotā hai

kitnī uljhan meñ apnā dil hotā hai

merī ḳhushī kā bhed hai bas ye sab kā dukh

mere apne dukh meñ shāmil hotā hai

ilm kī mere yaar sanad pahchān nahīñ

bahut paḌhā likkhā bhī jāhil hotā hai

sayyad-zāde dil māñgo yā dād-e-hunar

saa.il to har haal meñ saa.il hotā hai

biit ga.ī jab umr to ye mālūm huā

ek ishāra umr kā hāsil hotā hai

ek hañsī lāchārī ko kuchh aur baḌhā.e

ek hañsī se dushman ghā.il hotā hai

ai mire dil ai achchhe dil ai ḳhāna-ḳharāb

tū kyuuñ har takrār meñ shāmil hotā hai

sah leñ ham duniyā ke sitam 'shāhīn' magar

ziddī dil har aan muqābil hotā hai

sach ka lamha jab bhi nazil hota hai

kitni uljhan mein apna dil hota hai

meri KHushi ka bhed hai bas ye sab ka dukh

mere apne dukh mein shamil hota hai

ilm ki mere yar sanad pahchan nahin

bahut paDha likkha bhi jahil hota hai

sayyad-zade dil mango ya dad-e-hunar

sail to har haal mein sail hota hai

bit gai jab umr to ye malum hua

ek ishaara umr ka hasil hota hai

ek hansi lachaari ko kuchh aur baDhae

ek hansi se dushman ghail hota hai

ai mere dil ai achchhe dil ai KHana-KHarab

tu kyun har takrar mein shamil hota hai

sah len hum duniya ke sitam 'shahin' magar

ziddi dil har aan muqabil hota hai