sach to ye hai ki dida-war ho tum

sach to ye hai ki dīda-var ho tum

be-ḳhabar ham haiñ bā-ḳhabar ho tum

vāqif-e-rāz-e-ḳhair-o-shar ho tum

ḳhush-ḳhayāl aur ḳhush-nazar ho tum

āshnā-e-rumūz-e-kun-fa-yakun

rāz-e-hastī se bā-ḳhabar ho tum

jis se raushan hai matl.a-e-ummīd

shām-e-ġhurbat meñ vo sahar ho tum

kaun hai ye harīf-e-sho.ala-e-tūr

ai maiñ qurbān jalva-gar ho tum

dasht-e-ġhurbat meñ rāh-e-hastī meñ

maiñ samajhtā huuñ ham-safar ho tum

ek nisbat hai nisbat-e-mauhūm

be-navā maiñ huuñ tājvar ho tum

'rāz' do aib haiñ yahī tum meñ

sāf-go aur haq-nigar ho tum

sach to ye hai ki dida-war ho tum

be-KHabar hum hain ba-KHabar ho tum

waqif-e-raaz-e-KHair-o-shar ho tum

KHush-KHayal aur KHush-nazar ho tum

aashna-e-rumuz-e-kun-fa-yakun

raaz-e-hasti se ba-KHabar ho tum

jis se raushan hai matla-e-ummid

sham-e-ghurbat mein wo sahar ho tum

kaun hai ye harif-e-shoala-e-tur

ai main qurban jalwa-gar ho tum

dasht-e-ghurbat mein rah-e-hasti mein

main samajhta hun ham-safar ho tum

ek nisbat hai nisbat-e-mauhum

be-nawa main hun tajwar ho tum

'raaz' do aib hain yahi tum mein

saf-go aur haq-nigar ho tum