dil mein ek lahr si uThi hai abhi

dil meñ ik lahr sī uThī hai abhī

koī taaza havā chalī hai abhī

kuchh to nāzuk mizāj haiñ ham bhī

aur ye choT bhī na.ī hai abhī

shor barpā hai ḳhāna-e-dil meñ

koī dīvār sī girī hai abhī

bharī duniyā meñ jī nahīñ lagtā

jaane kis chiiz kī kamī hai abhī

tū sharīk-e-suḳhan nahīñ hai to kyā

ham-suḳhan terī ḳhāmushī hai abhī

yaad ke be-nishāñ jazīroñ se

terī āvāz aa rahī hai abhī

shahr kī be-charāġh galiyoñ meñ

zindagī tujh ko DhūñDtī hai abhī

so ga.e log us havelī ke

ek khiḌkī magar khulī hai abhī

tum to yaaro abhī se uTh baiThe

shahr meñ raat jāgtī hai abhī

vaqt achchhā bhī aa.egā 'nāsir'

ġham na kar zindagī paḌī hai abhī

dil mein ek lahr si uThi hai abhi

koi taza hawa chali hai abhi

kuchh to nazuk mizaj hain hum bhi

aur ye choT bhi nai hai abhi

shor barpa hai KHana-e-dil mein

koi diwar si giri hai abhi

bhari duniya mein ji nahin lagta

jaane kis chiz ki kami hai abhi

tu sharik-e-suKHan nahin hai to kya

ham-suKHan teri KHamushi hai abhi

yaad ke be-nishan jaziron se

teri aawaz aa rahi hai abhi

shahr ki be-charagh galiyon mein

zindagi tujh ko DhunDti hai abhi

so gae log us haweli ke

ek khiDki magar khuli hai abhi

tum to yaro abhi se uTh baiThe

shahr mein raat jagti hai abhi

waqt achchha bhi aaega 'nasir'

gham na kar zindagi paDi hai abhi