gae dinon ka suragh le kar kidhar se aaya kidhar gaya wo

ga.e dinoñ kā surāġh le kar kidhar se aayā kidhar gayā vo

ajiib mānūs ajnabī thā mujhe to hairān kar gayā vo

bas ek motī sī chhab dikhā kar bas ek mīThī sī dhun sunā kar

sitāra-e-shām ban ke aayā ba-rañg-e-ḳhvāb-e-sahar gayā vo

ḳhushī kī rut ho ki ġham kā mausam nazar use DhūñDtī hai har dam

vo bū-e-gul thā ki naġhma-e-jāñ mire to dil meñ utar gayā vo

na ab vo yādoñ kā chaḌhtā dariyā na fursatoñ kī udaas barkhā

yūñhī zarā sī kasak hai dil meñ jo zaḳhm gahrā thā bhar gayā vo

kuchh ab sambhalne lagī hai jaañ bhī badal chalā daur-e-āsmāñ bhī

jo raat bhārī thī Tal ga.ī hai jo din kaḌā thā guzar gayā vo

bas ek manzil hai bul-havas kī hazār raste haiñ ahl-e-dil ke

yahī to hai farq mujh meñ us meñ guzar gayā maiñ Thahar gayā vo

shikasta-pā raah meñ khaḌā huuñ ga.e dinoñ ko bulā rahā huuñ

jo qāfila merā ham-safar thā misāl-e-gard-e-safar gayā vo

mirā tū ḳhuuñ ho gayā hai paanī sitamgaroñ kī palak na bhīgī

jo naala uTThā thā raat dil se na jaane kyuuñ be-asar gayā vo

vo mai-kade ko jagāne vaalā vo raat kī niiñd uḌāne vaalā

ye aaj kyā us ke jī meñ aa.ī ki shaam hote hī ghar gayā vo

vo hijr kī raat kā sitāra vo ham-nafas ham-suḳhan hamārā

sadā rahe us kā naam pyārā sunā hai kal raat mar gayā vo

vo jis ke shāne pe haath rakh kar safar kiyā tū ne manziloñ kā

tirī galī se na jaane kyuuñ aaj sar jhukā.e guzar gayā vo

vo raat kā be-navā musāfir vo terā shā.ir vo terā 'nāsir'

tirī galī tak to ham ne dekhā thā phir na jaane kidhar gayā vo

gae dinon ka suragh le kar kidhar se aaya kidhar gaya wo

ajib manus ajnabi tha mujhe to hairan kar gaya wo

bas ek moti si chhab dikha kar bas ek miThi si dhun suna kar

sitara-e-sham ban ke aaya ba-rang-e-KHwab-e-sahar gaya wo

KHushi ki rut ho ki gham ka mausam nazar use DhunDti hai har dam

wo bu-e-gul tha ki naghma-e-jaan mere to dil mein utar gaya wo

na ab wo yaadon ka chaDhta dariya na fursaton ki udas barkha

yunhi zara si kasak hai dil mein jo zaKHm gahra tha bhar gaya wo

kuchh ab sambhalne lagi hai jaan bhi badal chala daur-e-asman bhi

jo raat bhaari thi Tal gai hai jo din kaDa tha guzar gaya wo

bas ek manzil hai bul-hawas ki hazar raste hain ahl-e-dil ke

yahi to hai farq mujh mein us mein guzar gaya main Thahar gaya wo

shikasta-pa rah mein khaDa hun gae dinon ko bula raha hun

jo qafila mera ham-safar tha misal-e-gard-e-safar gaya wo

mera tu KHun ho gaya hai pani sitamgaron ki palak na bhigi

jo nala uTTha tha raat dil se na jaane kyun be-asar gaya wo

wo mai-kade ko jagane wala wo raat ki nind uDane wala

ye aaj kya us ke ji mein aai ki sham hote hi ghar gaya wo

wo hijr ki raat ka sitara wo ham-nafas ham-suKHan hamara

sada rahe us ka nam pyara suna hai kal raat mar gaya wo

wo jis ke shane pe hath rakh kar safar kiya tu ne manzilon ka

teri gali se na jaane kyun aaj sar jhukae guzar gaya wo

wo raat ka be-nawa musafir wo tera shair wo tera 'nasir'

teri gali tak to hum ne dekha tha phir na jaane kidhar gaya wo