hai bikharne ko ye mahfil-e-rang-o-bu tum kahan jaoge hum kahan jaenge

hai bikharne ko ye mahfil-e-rañg-o-bū tum kahāñ jāoge ham kahāñ jā.eñge

har taraf ho rahī hai yahī guftugū tum kahāñ jāoge ham kahāñ jā.eñge

har matā-e-nafas nazr-e-āhañg kī ham ko yārāñ havas thī bahut rang kī

gul-zamīñ se ubalne ko hai ab lahū tum kahāñ jāoge ham kahāñ jā.eñge

avval-e-shab kā mahtāb bhī jā chukā sehn-e-mai-ḳhāna se ab ufuq meñ kahīñ

āḳhir-e-shab hai ḳhālī haiñ jām-o-subū tum kahāñ jāoge ham kahāñ jā.eñge

koī hāsil na thā aarzū kā magar sāneha ye hai ab aarzū bhī nahīñ

vaqt kī is masāfat meñ be-ārzū tum kahāñ jāoge ham kahāñ jā.eñge

kis qadar duur se lauT kar aa.e haiñ yuuñ kaho umr barbād kar aa.e haiñ

thā sarāb apnā sarmāya-e-justujū tum kahāñ jāoge ham kahāñ jā.eñge

ik junūñ thā ki ābād ho shahr-e-jāñ aur ābād jab shahr-e-jāñ ho gayā

haiñ ye sargoshiyāñ dar-ba-dar kū-ba-kū tum kahāñ jāoge ham kahāñ jā.eñge

dasht meñ raqs-e-shauq-e-bahār ab kahāñ bād-paimā.ī-e-dīvāna-vār ab kahāñ

bas guzarne ko hai mausam-e-hāv-hū tum kahāñ jāoge ham kahāñ jā.eñge

ham haiñ rusvā-kun-e-dillī-o-lucknow apnī kyā zindagī apnī kyā aabrū

'mīr' dillī se nikle ga.e lucknow tum kahāñ jāoge ham kahāñ jā.eñge

hai bikharne ko ye mahfil-e-rang-o-bu tum kahan jaoge hum kahan jaenge

har taraf ho rahi hai yahi guftugu tum kahan jaoge hum kahan jaenge

har mata-e-nafas nazr-e-ahang ki hum ko yaran hawas thi bahut rang ki

gul-zamin se ubalne ko hai ab lahu tum kahan jaoge hum kahan jaenge

awwal-e-shab ka mahtab bhi ja chuka sehn-e-mai-KHana se ab ufuq mein kahin

aaKHir-e-shab hai KHali hain jam-o-subu tum kahan jaoge hum kahan jaenge

koi hasil na tha aarzu ka magar saneha ye hai ab aarzu bhi nahin

waqt ki is masafat mein be-arzu tum kahan jaoge hum kahan jaenge

kis qadar dur se lauT kar aae hain yun kaho umr barbaad kar aae hain

tha sarab apna sarmaya-e-justuju tum kahan jaoge hum kahan jaenge

ek junun tha ki aabaad ho shahr-e-jaan aur aabaad jab shahr-e-jaan ho gaya

hain ye sargoshiyan dar-ba-dar ku-ba-ku tum kahan jaoge hum kahan jaenge

dasht mein raqs-e-shauq-e-bahaar ab kahan baad-paimai-e-diwana-war ab kahan

bas guzarne ko hai mausam-e-haw-hu tum kahan jaoge hum kahan jaenge

hum hain ruswa-kun-e-dilli-o-lucknow apni kya zindagi apni kya aabru

'mir' dilli se nikle gae lucknow tum kahan jaoge hum kahan jaenge