sada rahe tera gham salamat yahi asasa hai aabru ka

sadā rahe terā ġham salāmat yahī asāsa hai aabrū kā

ye daulat-e-dil baham na hotī to kaun pursāñ thā aarzū kā

umaD ke aayā hai ai azīzo ravish ravish sail rañg-o-bū kā

magar na phir bhī nasīb chamkā agar mirī ḳhāk-e-be-numū kā

misāl-e-sub.h-e-bahār tū hai to maiñ huuñ shām-e-ḳhizāñ kī sūrat

chaman chaman ḳhār-o-ḳhas se mere faroġh hai tere rañg-o-bū kā

base to mere mashām-e-jāñ meñ mahak tire nāma-e-nafas kī

khule to parcham kabhī mire dosh par tirī zulf-e-mushkbū kā

musāfirān-e-safīna-e-jāñ ravāñ haiñ kin manziloñ kī jānib

havā kī zad par shab-e-siyah meñ alam kiye bādbāñ lahū kā

qabā-e-jāñ taar taar apnī huī bahut kāvish-e-rafū meñ

magar isī se khulā hai āḳhir bharam har ik chaak har rafū kā

jo mere ehsās-e-be-zabāñ ko zabāñ milī to chamak uThā hai

sharāra ban kar kahīñ navā kā charāġh ban kar kahīñ pe lū kā

sada rahe tera gham salamat yahi asasa hai aabru ka

ye daulat-e-dil baham na hoti to kaun pursan tha aarzu ka

umaD ke aaya hai ai azizo rawish rawish sail rang-o-bu ka

magar na phir bhi nasib chamka agar meri KHak-e-be-numu ka

misal-e-subh-e-bahaar tu hai to main hun sham-e-KHizan ki surat

chaman chaman KHar-o-KHas se mere farogh hai tere rang-o-bu ka

base to mere masham-e-jaan mein mahak tere nama-e-nafas ki

khule to parcham kabhi mere dosh par teri zulf-e-mushkbu ka

musafiran-e-safina-e-jaan rawan hain kin manzilon ki jaanib

hawa ki zad par shab-e-siyah mein alam kiye baadban lahu ka

qaba-e-jaan tar tar apni hui bahut kawish-e-rafu mein

magar isi se khula hai aaKHir bharam har ek chaak har rafu ka

jo mere ehsas-e-be-zaban ko zaban mili to chamak uTha hai

sharara ban kar kahin nawa ka charagh ban kar kahin pe lu ka