sadaqat ki yahan izzat nahin hai

sadāqat kī yahāñ izzat nahīñ hai

vafādārī kī kuchh qīmat nahīñ hai

jahāñ se vo gayā thā maiñ vahīñ huuñ

magar jiine meñ vo lazzat nahīñ hai

zabāñ pe talḳhiyāñ āñkhoñ meñ ġhussa

magar kirdār meñ ḳhissat nahīñ hai

vaqār apnā nahīñ kotāh lekin

tire rutbe sī bhī qāmat nahīñ hai

rahe miTTī kī ḳhushbū yaad har-dam

to sāñseñ roktī ġhurbat nahīñ hai

jahālat meñ palī duniyā meñ shāyad

ta.aqqul se baḌī ne.amat nahīñ hai

chalā chal sar uThā kar yaar 'nāqid'

lagī ab tak koī tohmat nahīñ hai

sadaqat ki yahan izzat nahin hai

wafadari ki kuchh qimat nahin hai

jahan se wo gaya tha main wahin hun

magar jine mein wo lazzat nahin hai

zaban pe talKHiyan aankhon mein ghussa

magar kirdar mein KHissat nahin hai

waqar apna nahin kotah lekin

tere rutbe si bhi qamat nahin hai

rahe miTTi ki KHushbu yaad har-dam

to sansen rokti ghurbat nahin hai

jahaalat mein pali duniya mein shayad

taqqul se baDi neamat nahin hai

chala chal sar uTha kar yar 'naqid'

lagi ab tak koi tohmat nahin hai