صداقتوں کو یہ ضد ہے زباں تلاش کروں

صداقتوں کو یہ ضد ہے زباں تلاش کروں

جو شے کہیں نہ ملے میں کہاں تلاش کروں

مری ہوس کے مقابل یہ شہر چھوٹے ہیں

خلا میں جا کے نئی بستیاں تلاش کروں

اذیتوں کی بھی اپنی ہی ایک لذت ہے

میں شہر شہر پھروں نیکیاں تلاش کروں

مکاں فریب خوشامد معاش سمجھوتے

برائے کشتیٔ جاں بادباں تلاش کروں

تو کب تلک یوں ہی سورج تلے رہے گی دھوپ

ترے لئے بھی کوئی سائباں تلاش کروں

گہر نصیب صدف کا تو ذکر کیا انجمؔ

میں ساحلوں کے لئے سیپیاں تلاش کروں