sadaf ke karb ko wo manta hai

sadaf ke karb ko vo māntā hai

ik ik motī kī qīmat jāntā hai

nafāsat se banātā hai khilaune

pasīne se jo miTTī sāntā hai

kahīñ jā.ūñ vo mujh ko DhūñD legā

mujhe merā amal pahchāntā hai

mayassar hai havā-e-dasht us ko

ridā-e-gard se jo chhāntā hai

jo rahtā hai azal kī justujū meñ

vo duniyā meñ kise gardāntā hai

mire qadmoñ se vābasta masāfat

mujhe har rāsta pahchāntā hai

mubārak tujh ko terī be-zamīrī

mujhe is jurm meñ kyuuñ sāntā hai

kasāfat se hai tauqīr-e-latāfat

añdherā raushnī ko chhāntā hai

jise hai yaad qaumoñ kī kahānī

havā ke ruḳh ko vo pahchāntā hai

azal se 'ramz' ye zeb-e-nazar hai

kahīñ salmā kahīñ vo kāntā hai

sadaf ke karb ko wo manta hai

ek ek moti ki qimat jaanta hai

nafasat se banata hai khilaune

pasine se jo miTTi santa hai

kahin jaun wo mujh ko DhunD lega

mujhe mera amal pahchanta hai

mayassar hai hawa-e-dasht us ko

rida-e-gard se jo chhanta hai

jo rahta hai azal ki justuju mein

wo duniya mein kise gardanta hai

mere qadmon se wabasta masafat

mujhe har rasta pahchanta hai

mubarak tujh ko teri be-zamiri

mujhe is jurm mein kyun santa hai

kasafat se hai tauqir-e-latafat

andhera raushni ko chhanta hai

jise hai yaad qaumon ki kahani

hawa ke ruKH ko wo pahchanta hai

azal se 'ramz' ye zeb-e-nazar hai

kahin salma kahin wo kanta hai