saDak ka dard daraKHton se ham-kanar na ho

saḌak kā dard daraḳhtoñ se ham-kanār na ho

musāfiroñ ko bhī itnā safar se pyaar na ho

zamāna bol rahā ho to muḳhtasar bole

agar vo bol rahā ho to iḳhtisār na ho

zamīn apne kaTāv pe ro ke kahtī hai

daraḳht kāTne vāloñ pe e'tibār na ho

kisī ne Thekā nahīñ le rakhā zamāne kā

tumhārā ġham ho to phir kaun sogvār na ho

maiñ ik ishāre pe niklā huuñ qāfile se ki bas

jo be-dilī kā ishāra hai bār-bār na ho

isī maqām ko zillat kī maut kahte haiñ

koī shu.ūr ke mausam meñ sharmsār na ho

zamāna aise mirī dastaras meñ hai 'abdul'

ki jaise baap ko beToñ pe iḳhtiyār na ho

saDak ka dard daraKHton se ham-kanar na ho

musafiron ko bhi itna safar se pyar na ho

zamana bol raha ho to muKHtasar bole

agar wo bol raha ho to iKHtisar na ho

zamin apne kaTaw pe ro ke kahti hai

daraKHt kaTne walon pe e'tibar na ho

kisi ne Theka nahin le rakha zamane ka

tumhaara gham ho to phir kaun sogwar na ho

main ek ishaare pe nikla hun qafile se ki bas

jo be-dili ka ishaara hai bar-bar na ho

isi maqam ko zillat ki maut kahte hain

koi shuur ke mausam mein sharmsar na ho

zamana aise meri dastaras mein hai 'abdul'

ki jaise bap ko beTon pe iKHtiyar na ho