safa almas o gauhar se fuzun hai tere dandan ki

safā almās o gauhar se fuzūñ hai tere dandāñ kī

kahāñ tujh lab ke aage qadr-o-qīmat la.al-o-marjāñ kī

'ajab kī sāhirī us man-haran ke chashm-e-fattāñ ne

diyā kājal siyāhī le ke āñkhoñ se ġhazālāñ kī

tujhe ai lāla-rū vo husn-e-rañgīñ hai ki gul-rūyāñ

'abīrī pairahan karte haiñ terī gard-e-dāmāñ kī

'abas mal mal ke dhotā hai tū apne dast-e-nāzuk ko

nahīñ jaane kī surḳhī haath se ḳhūn-e-shahīdāñ kī

bahār aa.ī chaman meñ gul khile ai bāġhbāñ shāyad

junūñ ne dhajjiyāñ gar jo uḌā.īñ phir garebāñ kī

qad-e-mauzūñ to shamshād-o-sanobar rakhte haiñ lekin

kahāñ pāveñ laTak kī chaal us sarv-e-ḳhirāmāñ kī

na dekhī aañkh uTThā bad-halī-e-āshuftagāñ zālim

banātā hī rahā tū ḳhush-ḳhumī zulf-e-pareshāñ kī

barahna-pā junūñ āvāra kaun is dasht se guzrā

ki rangīñ ḳhuuñ se hai yaañ nok har ḳhār-e-muġhīlāñ kī

rakho mat chashm-e-ḳhvāb ai dosto 'bedār' se hargiz

koī detī hai sone yaad us rū-e-daraḳhshāñ kī

safa almas o gauhar se fuzun hai tere dandan ki

kahan tujh lab ke aage qadr-o-qimat lal-o-marjaan ki

'ajab ki sahiri us man-haran ke chashm-e-fattan ne

diya kajal siyahi le ke aankhon se ghazalan ki

tujhe ai lala-ru wo husn-e-rangin hai ki gul-ruyan

'abiri pairahan karte hain teri gard-e-daman ki

'abas mal mal ke dhota hai tu apne dast-e-nazuk ko

nahin jaane ki surKHi hath se KHun-e-shahidan ki

bahaar aai chaman mein gul khile ai baghban shayad

junun ne dhajjiyan gar jo uDain phir gareban ki

qad-e-mauzun to shamshad-o-sanobar rakhte hain lekin

kahan pawen laTak ki chaal us sarw-e-KHiraman ki

na dekhi aankh uTTha bad-hali-e-ashuftagan zalim

banata hi raha tu KHush-KHumi zulf-e-pareshan ki

barahna-pa junun aawara kaun is dasht se guzra

ki rangin KHun se hai yan nok har KHar-e-mughilan ki

rakho mat chashm-e-KHwab ai dosto 'bedar' se hargiz

koi deti hai sone yaad us ru-e-daraKHshan ki