safar-e-manzil-e-shab yaad nahin

safar-e-manzil-e-shab yaad nahīñ

log ruḳhsat hue kab yaad nahīñ

avvalīñ qurb kī sarshārī meñ

kitne armāñ the jo ab yaad nahīñ

dil meñ har vaqt chubhan rahtī thī

thī mujhe kis kī talab yaad nahīñ

vo sitārā thī ki shabnam thī ki phuul

ek sūrat thī ajab yaad nahīñ

kaisī vīrāñ hai guzar-gāh-e-ḳhayāl

jab se vo aariz o lab yaad nahīñ

bhūlte jaate haiñ maazī ke dayār

yaad aa.eñ bhī to sab yaad nahīñ

aisā uljhā huuñ ġham-e-duniyā meñ

ek bhī ḳhvāb-e-tarab yaad nahīñ

rishta-e-jāñ thā kabhī jis kā ḳhayāl

us kī sūrat bhī to ab yaad nahīñ

ye haqīqat hai ki ahbāb ko ham

yaad hī kab the jo ab yaad nahīñ

yaad hai sair-e-charāġhāñ 'nāsir'

dil ke bujhne kā sabab yaad nahīñ

safar-e-manzil-e-shab yaad nahin

log ruKHsat hue kab yaad nahin

awwalin qurb ki sarshaari mein

kitne arman the jo ab yaad nahin

dil mein har waqt chubhan rahti thi

thi mujhe kis ki talab yaad nahin

wo sitara thi ki shabnam thi ki phul

ek surat thi ajab yaad nahin

kaisi viran hai guzar-gah-e-KHayal

jab se wo aariz o lab yaad nahin

bhulte jate hain mazi ke dayar

yaad aaen bhi to sab yaad nahin

aisa uljha hun gham-e-duniya mein

ek bhi KHwab-e-tarab yaad nahin

rishta-e-jaan tha kabhi jis ka KHayal

us ki surat bhi to ab yaad nahin

ye haqiqat hai ki ahbab ko hum

yaad hi kab the jo ab yaad nahin

yaad hai sair-e-charaghan 'nasir'

dil ke bujhne ka sabab yaad nahin