safar-e-zindagi nahin aasan

safar-e-zindagī nahīñ āsāñ

har taraf raah meñ haiñ sañg-e-girāñ

duur ho jaa.eñ dukh zamāne ke

sāhab-e-dard ho agar insāñ

sochnā paḌ gayā zamāne ko

miT ke bhī ham na jab hue arzāñ

tū ise tanz kyuuñ samajhtā hai

maiñ to hālāt kar rahā huuñ bayāñ

jī rahā huuñ kuchh is tarah jaise

aag lag jaa.e aur ho na dhuāñ

tū mirī baat kā javāb na de

maiñ samajhtā huuñ ḳhāmushī kī zabāñ

nukta-chīnī hasad dil-āzārī

aur kyā hai matā-e-be-hunarāñ

mujh ko us ko talāsh hai 'rif.at'

jo mire dil meñ hai kahīñ pinhāñ

safar-e-zindagi nahin aasan

har taraf rah mein hain sang-e-giran

dur ho jaen dukh zamane ke

sahab-e-dard ho agar insan

sochna paD gaya zamane ko

miT ke bhi hum na jab hue arzan

tu ise tanz kyun samajhta hai

main to haalat kar raha hun bayan

ji raha hun kuchh is tarah jaise

aag lag jae aur ho na dhuan

tu meri baat ka jawab na de

main samajhta hun KHamushi ki zaban

nukta-chini hasad dil-azari

aur kya hai mata-e-be-hunaran

mujh ko us ko talash hai 'rifat'

jo mere dil mein hai kahin pinhan