safar ka aur koi silsila nikalenge

safar kā aur koī silsila nikāleñge

bhaTak ga.e to nayā rāsta nikāleñge

qarīb aane lagegī jo vasl kī manzil

ham apne biich koī fāsla nikāleñge

sameT kar kisī kone meñ gaThḌiyāñ ġham kī

na.ī ḳhushī ke liye ham jagah nikāleñge

baneñge ishq-e-adālat meñ ham vakīl tire

purānī baat meñ nukta nayā nikāleñge

rahe jo umr kī puujā ke ba.ad bhī patthar

diloñ se ham vo sabhī devtā nikāleñge

tirī jafā meñ milā kar sitam zamāne ke

sharāb-e-ġham kā ajab zā.iqa nikāleñge

hameñ ḳhamosh kiyā jā.egā sadā ke liye

agar zabān se koī sadā nikāleñge

bharegī niiñd jo in be-qarār āñkhoñ se

ham ek umr kā ye rat-jagā nikāleñge

safar ka aur koi silsila nikalenge

bhaTak gae to naya rasta nikalenge

qarib aane lagegi jo wasl ki manzil

hum apne bich koi fasla nikalenge

sameT kar kisi kone mein gaThDiyan gham ki

nai KHushi ke liye hum jagah nikalenge

banenge ishq-e-adalat mein hum wakil tere

purani baat mein nukta naya nikalenge

rahe jo umr ki puja ke baad bhi patthar

dilon se hum wo sabhi dewta nikalenge

teri jafa mein mila kar sitam zamane ke

sharab-e-gham ka ajab zaiqa nikalenge

hamein KHamosh kiya jaega sada ke liye

agar zaban se koi sada nikalenge

bharegi nind jo in be-qarar aankhon se

hum ek umr ka ye rat-jaga nikalenge