safar mein rah ke aashob se na Dar jaana

safar meñ raah ke āshob se na Dar jaanā

paḌe jo aag kā dariyā to paar kar jaanā

ye ik ishāra hai āfāt-e-nā-gahānī kā

kisī maqām se chiḌiyoñ kā kuuch kar jaanā

ye intiqām hai dasht-e-balā se bādal kā

samundaroñ pe baraste hue guzar jaanā

tumhārā qurb bhī duurī kā isti.āra hai

ki jaise chāñd kā tālāb meñ utar jaanā

tulū-e-mahr-e-daraḳhshāñ kī ik alāmat hai

uThā.e sham-e-yaqīñ us kā daar par jaanā

the razm-gāh-e-mohabbat ke bhī ajab andāz

usī ne vaar kiyā jis ne be-sipar jaanā

har ik nafas pe guzartā hai ye gumāñ jaise

charāġh le ke havāoñ se jañg par jaanā

ham apne ishq kī ab aur kyā shahādat deñ

hameñ hamāre raqīboñ ne mo'tabar jaanā

mire yaqīñ ko baḌā bad-gumān kar ke gayā

duā-e-nīm-shabī terā be-asar jaanā

har ek shāḳh ko pahnā gayā numū kā libās

safīr-e-mausam-e-gul kā shajar shajar jaanā

zamāna biit gayā tark-e-ishq ko 'tishna'

magar gayā na hamārā idhar udhar jaanā

safar mein rah ke aashob se na Dar jaana

paDe jo aag ka dariya to par kar jaana

ye ek ishaara hai aafat-e-na-gahani ka

kisi maqam se chiDiyon ka kuch kar jaana

ye intiqam hai dasht-e-bala se baadal ka

samundaron pe baraste hue guzar jaana

tumhaara qurb bhi duri ka istiara hai

ki jaise chand ka talab mein utar jaana

tulu-e-mahr-e-daraKHshan ki ek alamat hai

uThae sham-e-yaqin us ka dar par jaana

the razm-gah-e-mohabbat ke bhi ajab andaz

usi ne war kiya jis ne be-sipar jaana

har ek nafas pe guzarta hai ye guman jaise

charagh le ke hawaon se jang par jaana

hum apne ishq ki ab aur kya shahadat den

hamein hamare raqibon ne mo'tabar jaana

mere yaqin ko baDa bad-guman kar ke gaya

dua-e-nim-shabi tera be-asar jaana

har ek shaKH ko pahna gaya numu ka libas

safir-e-mausam-e-gul ka shajar shajar jaana

zamana bit gaya tark-e-ishq ko 'tishna'

magar gaya na hamara idhar udhar jaana