safir-e-fan the so taswir kar diye gae hum

safīr-e-fan the so tasvīr kar diye ga.e ham

phir ek ḳhvāb se tābīr kar diye ga.e ham

ham ik ḳhayāl the firdaus-e-ham-e-ḳhayālāñ kā

so ik ḳharābe meñ ta.amīr kar diye ga.e ham

savāliyān-e-siyah-baḳht kī tarah tah-e-teġh

ba-nām-e-adl jahāñgīr kar diye ga.e ham

shahīd kar ke bhī mausam ne kab rihā.ī dī

shajar kī shāḳh meñ zanjīr kar diye ga.e ham

ham is se pahle bhī ik dāstāñ the aur ab to

salīb-o-dār pe tahrīr kar diye ga.e ham

ḳhadañg-e-zulm vo barse ki ḳhud bhī āḳhir-e-kār

nigāh-e-zulm meñ shamshīr kar diye ga.e ham

ye ramz-e-nukta-varī hai ki taur-e-hīla-garī

rahīn-e-zillat-e-taqdīr kar diye ga.e ham

miTe ham apnī zamīñ par to kyā maqām milā

yahī ki dafn ba-tauqīr kar diye ga.e ham

safir-e-fan the so taswir kar diye gae hum

phir ek KHwab se tabir kar diye gae hum

hum ek KHayal the firdaus-e-ham-e-KHayalan ka

so ek KHarabe mein tamir kar diye gae hum

sawaliyan-e-siyah-baKHt ki tarah tah-e-tegh

ba-nam-e-adl jahangir kar diye gae hum

shahid kar ke bhi mausam ne kab rihai di

shajar ki shaKH mein zanjir kar diye gae hum

hum is se pahle bhi ek dastan the aur ab to

salib-o-dar pe tahrir kar diye gae hum

KHadang-e-zulm wo barse ki KHud bhi aaKHir-e-kar

nigah-e-zulm mein shamshir kar diye gae hum

ye ramz-e-nukta-wari hai ki taur-e-hila-gari

rahin-e-zillat-e-taqdir kar diye gae hum

miTe hum apni zamin par to kya maqam mila

yahi ki dafn ba-tauqir kar diye gae hum