sahar aur sham se kuchh yun guzarta ja raha hun main

sahar aur shaam se kuchh yuuñ guzartā jā rahā huuñ maiñ

ki jiitā jā rahā huuñ aur martā jā rahā huuñ maiñ

tamannā-e-muhāl-e-dil ko juzv-e-zindagī kar ke

fasāna ziist kā pechīda kartā jā rahā huuñ maiñ

gul-e-rañgīñ ye kahtā hai ki khilnā husn khonā hai

magar ġhuncha samajhtā hai nikhartā jā rahā huuñ maiñ

mirā dil bhī ajab ik sāġhar-e-zauq-e-tamannā hai

ki hai ḳhālī kā ḳhālī aur bhartā jā rahā huuñ maiñ

kahāñ tak irtibāt-e-jān-o-jānāñ kā ta.alluq hai

sañvarte jā rahe haiñ vo sañvartā jā rahā huuñ maiñ

javānī jā rahī hai aur maiñ mahv-e-tamāshā huuñ

uḌī jaatī hai manzil aur Thahartā jā rahā huuñ maiñ

bahut ūñchā uḌā lekin ab is auj-e-taḳhayyul se

kisī duniyā-e-rañgīñ meñ utartā jā rahā huuñ maiñ

'nushūr' āḳhir kahāñ tak fikr-e-duniyā dil dukhā.egī

ġham-e-hastī ko zauq-e-sher kartā jā rahā huuñ maiñ

sahar aur sham se kuchh yun guzarta ja raha hun main

ki jita ja raha hun aur marta ja raha hun main

tamanna-e-muhaal-e-dil ko juzw-e-zindagi kar ke

fasana zist ka pechida karta ja raha hun main

gul-e-rangin ye kahta hai ki khilna husn khona hai

magar ghuncha samajhta hai nikharta ja raha hun main

mera dil bhi ajab ek saghar-e-zauq-e-tamanna hai

ki hai KHali ka KHali aur bharta ja raha hun main

kahan tak irtibaat-e-jaan-o-jaanan ka talluq hai

sanwarte ja rahe hain wo sanwarta ja raha hun main

jawani ja rahi hai aur main mahw-e-tamasha hun

uDi jati hai manzil aur Thaharta ja raha hun main

bahut uncha uDa lekin ab is auj-e-taKHayyul se

kisi duniya-e-rangin mein utarta ja raha hun main

'nushur' aaKHir kahan tak fikr-e-duniya dil dukhaegi

gham-e-hasti ko zauq-e-sher karta ja raha hun main