sahar humne chaman-andar ajab dekha kal ek dilbar

sahar ham ne chaman-andar ajab dekhā kal ik dilbar

sahī qāmat parī-paikar muqattā-vaz.a ḳhush-manzar

suḳhan-bar ġhuncha-lab gul-rū jabīn-e-mahar aur kamāñ-abrū

do chashm-e-shoḳh pur-jādū nigah tiir aur mizha nashtar

shamīm-e-zulf mushk-e-afshāñ taġhāful sau sitam-sāmāñ

ġhurūr aur nāz-e-be-pāyāñ mizāj aur tab.a nāzuk-tar

adā.eñ sab fusūñ-ā.īñ na chhoḌeñ dil na chhoḌeñ diiñ

fareb-o-ishva sulh-āgīñ itāb-o-ġhamza jañg-āvar

ye dekhā ham ne jab aalam to rakh dil haath par hamdam

kahā haiñ nazr karte ham jo le liije to hai behtar

kahā le jā tū apnā dil ki tū kyā aur terā dil

na leveñ ham to aisā dil kahā jab ham ne yuuñ hañs kar

yahī ik dil hai bechārā bhalā hai yā ki nākāra

agarche hai ye āvāra va lekin hai vafā-parvar

jo nā-manzūr karte ho to kar do ye kab uThtā hai

hai jab tak dam meñ dam us ke rahegā ye usī dar par

'nazīr' us ne sunā ye jab to bolā yuuñ vo shīrīñ-lab

hamārā ho chukā ye ab bas is qisse ko kotah kar

sahar hum ne chaman-andar ajab dekha kal ek dilbar

sahi qamat pari-paikar muqatta-waza KHush-manzar

suKHan-bar ghuncha-lab gul-ru jabin-e-mahar aur kaman-abru

do chashm-e-shoKH pur-jadu nigah tir aur mizha nashtar

shamim-e-zulf mushk-e-afshan taghaful sau sitam-saman

ghurur aur naz-e-be-payan mizaj aur taba nazuk-tar

adaen sab fusun-ain na chhoDen dil na chhoDen din

fareb-o-ishwa sulh-agin itab-o-ghamza jang-awar

ye dekha hum ne jab aalam to rakh dil hath par hamdam

kaha hain nazr karte hum jo le lije to hai behtar

kaha le ja tu apna dil ki tu kya aur tera dil

na lewen hum to aisa dil kaha jab hum ne yun hans kar

yahi ek dil hai bechaara bhala hai ya ki nakara

agarche hai ye aawara wa lekin hai wafa-parwar

jo na-manzur karte ho to kar do ye kab uThta hai

hai jab tak dam mein dam us ke rahega ye usi dar par

'nazir' us ne suna ye jab to bola yun wo shirin-lab

hamara ho chuka ye ab bas is qisse ko kotah kar