sahar ko khoj charaghon pe inhisar na kar

sahar ko khoj charāġhoñ pe inhisār na kar

havā se dostī rakh us kā e'tibār na kar

yaqīn kar o mohabbat yahī munāsib hai

ziyāda din mirī sohbat ko iḳhtiyār na kar

ye koī rishta nahīñ hai faqat nadāmat hai

tū mujh se umr meñ kam hai so mujh se pyaar na kar

mujhe pata hai ki barbād ho chukā huuñ maiñ

tū merā sog manā mujh ko sogvār na kar

hai kaun kaun mire saath is musībat meñ

maiñ apne saath nahīñ huuñ mujhe shumār na kar

maiñ ḳhaak ḳhud tujhe labbaik kahne vāloñ meñ

mujhe bulāvā na de merā intizār na kar

sahar ko khoj charaghon pe inhisar na kar

hawa se dosti rakh us ka e'tibar na kar

yaqin kar o mohabbat yahi munasib hai

ziyaada din meri sohbat ko iKHtiyar na kar

ye koi rishta nahin hai faqat nadamat hai

tu mujh se umr mein kam hai so mujh se pyar na kar

mujhe pata hai ki barbaad ho chuka hun main

tu mera sog mana mujh ko sogwar na kar

hai kaun kaun mere sath is musibat mein

main apne sath nahin hun mujhe shumar na kar

main KHak KHud tujhe labbaik kahne walon mein

mujhe bulawa na de mera intizar na kar