sahn-e-chaman hai gosha-e-zindan tere baghair

sahn-e-chaman hai gosha-e-zindāñ tire baġhair

ma.amūra-e-hayāt hai vīrāñ tire baġhair

chhup chhup ke jis ko dekhne aatā thā māhtāb

zulmat-kada hai ab vo shabistāñ tire baġhair

jaltā hai chārasāz kī nādāniyoñ pe jī

maiñ aur mere dard kā darmāñ tire baġhair

sotī haiñ is meñ kitnī umīdeñ fanā kī niiñd

siina hai ek shahr-e-ḳhamoshāñ tire baġhair

merī hañsī ki thī tirā sarmāya-e-nashāt

aa dekh ab hai ḳhanda-e-giryāñ tire baġhair

mahtāb ke hujūm meñ gum ho ga.ī thī raat

phir qahr ban gayā ġham-e-daurāñ tire baġhair

jaltā hai tez tez taḌaptā hai pai-ba-pai

dil hai ki ek shola-e-larzāñ tire baġhair

maiñ hech huuñ magar mujhe itnā subuk na kar

maiñ aur nashāt-e-zīst kā armāñ tire baġhair

jis zindagī ko tū ne banāyā thā zindagī

vo zindagī hai ḳhvāb-e-pareshāñ tire baġhair

sahn-e-chaman hai gosha-e-zindan tere baghair

mamura-e-hayat hai viran tere baghair

chhup chhup ke jis ko dekhne aata tha mahtab

zulmat-kada hai ab wo shabistan tere baghair

jalta hai chaarasaz ki nadaniyon pe ji

main aur mere dard ka darman tere baghair

soti hain is mein kitni umiden fana ki nind

sina hai ek shahr-e-KHamoshan tere baghair

meri hansi ki thi tera sarmaya-e-nashat

aa dekh ab hai KHanda-e-giryan tere baghair

mahtab ke hujum mein gum ho gai thi raat

phir qahr ban gaya gham-e-dauran tere baghair

jalta hai tez tez taDapta hai pai-ba-pai

dil hai ki ek shola-e-larzan tere baghair

main hech hun magar mujhe itna subuk na kar

main aur nashat-e-zist ka arman tere baghair

jis zindagi ko tu ne banaya tha zindagi

wo zindagi hai KHwab-e-pareshan tere baghair